Both sides, now

2011-06-24T13:05:00.001Z

.. jájá. mundi lykilorðið og allt.

2010-03-11T09:35:00.001Z

Var fremur dugleg í gær - tók mig til og endurlas torfið í Hotlon og leiddi út þessar helv. jöfnur. Gekk bara vonum framar. Reyni að halda áfram í dag/kvöld.

2010-03-08T20:05:00.000Z

8. mars
Jæja, náði í skottið á bekknum í Kalnay - og á fremur lítið eftir í Holton.
Þarf að taka átak í Holton og Skýjunum á morgun og miðvikudaginn.
Svo get ég farið að pestra kennararna með spurningum.

2010-03-07T21:53:00.001Z

Það hefur lítið gerst yfir helgina.
En það er nú alveg í lagi - kláraði 1. kafla í Kalnay og svo er langur lestrardagur á morgun. Jibbí!

2010-03-05T21:59:00.001Z

5. mars
Tók til við nokkur verkefni í Skýjaeðlisfæði, las aftur yfir 4. og 5. kafla. Og byrjaði aftur á 6. kafla. - maður þarf alveg nokkrar yfirferðir til að ná þessu!
Klára svo 1. kaflan af Kalnay áður en ég fer að sofa.

Meiri Holton á morgun!

2010-03-04T12:36:00.001Z

3. mars
Kláraði 8.1, 8.2 í Holton (djöfulsins torf by the way!)
Byrjaði á Kalnay 1 kafla.

Skal halda áfram með skýjin í dag.

2010-03-02T08:52:00.001Z

1. mars

Kaflar 5 og 6 í Skýjum
8.0 og 8.1 í Holton.

Verkefnadagur í dag (á meðan Trausti sefur) og lestur í kvöld.

2010-03-01T01:46:00.001Z

28. febrúar
kláraði 4. kafla í Skýjaeðlisfræðinni. Svaf á mínu græna til rúmlega 16 eftir næturvaktina!

2010-02-28T04:43:00.002Z

Jæja

Það er langt síðan síðast.
Ekki svo að skilja að það hafi ekkert gerst - nóg um að vera eins og alltaf.
Ég náði sum sé prófunum í desember -sem var mikill léttir.
Nú er ég aftur skráð í tvo áfanga þessa önn, og vonandi fer sá þriðji sem er lesáfangi að detta í gang - sem minnir mig á að reka á eftir hr. professor Jóni Agli. Gangi þetta allt eftir á ég "bara" meistararitgerðina eftir eftir vorprófin.

Ég er aftur farin að vinna á VÍ, smávægilegar afleysingar og íhlaupastörf í hlutastarfi. Maður segir ekki nei við vinnu eins og ástandið er. Þetta væri í sjálfu sér allt í lagi ef Trausti væri í dagvistun. Sem hann er ekki - sem gerir það að verkum að ég hef lítinn tíma til að læra, í raun mun mun minni en fyrir áramót. Það sem meira er, mestur lærdómstíminn hefur undanfarið farið í prjón og annað dútl. Sem er auðvitað bara ávísun á panikk... sem einmitt er að bresta á.

Svo nú þarf að snúa við blaðinu og byrja að lesa grimmt.

Á tveimur vikum ætla ég mér eftirfarandi:

Fara yfir fyrirlestra:
http://www.cmp.caltech.edu/~mcc/Chaos_Course/Lesson1/Demos.html
Holton: Selected Chapters: > Ch 8.1, 8.2, 8.3, 8.5, 10.2 (pages before 10.2.1), 10.4, 10.6.
Euginia Kalnay: Kapittel 1 og Kapittel 6 unntatt avsnittene fra s. 218 (nederst: So far we have used...) til s. 220 øverst..

Kaflar 4-9 í Skýjaeðlisfræði - með verkefnum.

Það er svona að vera komin með allt í rugl- en þetta tekst alveg. Það bara verður að gera það, og til þess að halda mér við efnið kemur dagleg færsla um duglegheit - nú eða óduglegheit mín þann daginn.... spennandi ?

2009-12-01T10:04:00.002Z

heilt ár

Trausti er orðinn eins árs.
Fæddist kl. 03:19 1. deseber 2008.
Ég vakti ekki nótt til að taka af honum mynd nákvæmlega ári síðar. Hann vonandi fyrirgefur mér ónákvæmnina.

2009-11-23T00:30:00.001Z

Djöfulsins brjálæðis vinna er að vera í fullu meistaranámi í fjarnámi - í skóla sem býður ekki upp á fjarnám.
- Verandi svo með tvö börn líka.
Skil hreinlega ekki hverjum dettur svona vitleysa í hug...

2009-09-27T19:20:00.002Z

Á hjara veraldar?
Ekki alveg, en ég er sum sé stödd í Andøya. Sem er bara alveg hreint talsvert norðarlega í Noregi. Er hér á s.k. Rocket Range sem er einhversskonar tilraunastöð þeirra norðmanna. Þetta er mjög tæknilegt allt - hótel fyrir hópa eins og mína, en ég er einmitt hér með hópi úr áfanganum GEF 4320, Atmospheric Ratiation and remote sensing. Remote Sensing er sem sagt málið hér.

Ég flaug til Oslo í gærmorgun, keyrði í aftakaveðri my flybus til Keflavíkur ásamt tveimur öðrum veðurfræðingum. Ekki nema von að veðrið var svona slæmt.
Hér er ekkert almennilegt í sjónvarpinu- ég tók ekki tölvuna með mér svo líklega er málið prjón og snemma að sofa öll kvöld. Nema samnemendur mínir lumi á einhverjum óheyrilega skemmtilegum skemmtisögum. Verst hvað þeir gleyma sér alltaf og reyna að tala við mig á norsku.

Vis større kart

Þið ættuð að sjá hvar nákvæmlega ég er á þessu korti.
Allavega er hér íslenskt veður - rok og rigning. Og mig grunar að lopapeysan sem ég greip með mér komi sér vel í slyddunni sem spáð er á morgun!

2009-09-15T19:50:00.002Z

Vistaskipti

Þær breytingar hafa átt sér stað að Daníel er nú heimavinnandi húsfaðir á meðan ég sit á skrifstofu á Bústaðarveginum og læri allan daginn.
Ég viðurkenni fúslega að það gengur frekar hægt að koma sér í gang, en þetta hefst vonandi allt saman.
Ég upplifi mig samt dáldið sem mastersneman sem langar rosalega að vera ofboðslega klár í aflfræðinni en er það ekki... en það er vonandi bara af því að ég missi af því að hlusta á samnemendur mína spyrja spurninga í tímum. Svona að mestum hluta til amk.

Fyrsta Noregsferðin var farin síðustu mánaðarmót. Þar gekk allt nokkuð vel - helst að verðlagið og íslenska krónan hafi valdið hjartaverkjum dag eftir dag. Þó ég sé afskaplega sátt við almenningssamgöngur í Osló, finnst mér alveg einum of að borga næstum 900 kr íslenskar í strætó...aðra leið!

Næsta ferð verður svo farin núna næstu mánaðarmót, en þá er ferðinni heitir til norður Noregs, á námskeið í fjarkönnun. Meira veit ég ekki - nema ég reyni eftir fremsta megni að skilja tölvupóstsamskipti kennarans við bekkinn á norsku, en hef ákveðið að svo lengi sem ég er mætt á réttum tíma á Gardemoen þá hljóti þetta nú að reddast.

Af prjónafrontinum er þetta hins vegar nýlegt:

Ég sé á þessu að ég þarf að fara að prjóna á Snorra. Sem er fínt, flugferðir eru einkar heppinlegar fyrir prjónakonur í tímaþröng.

2009-08-09T00:11:00.003Z

Til prjónaóðra (kvenna sem og karla) :
Eftirfarandi eru uppskriftir eftir mig og eru fríar þeim sem vilja.

Sendið mér bara tölvupóst eða skiljið eftir komment og ég skal senda ykkur eintak.

2009-08-04T22:47:00.002Z

Best nýttu 60 fermetrarnir á landinu?
Í gær réðumst við í miklar breytingar á íbúðinni.
Helst í fréttum er að hjónaherbergið er komið í stofuna og strákarnir í hjónaherbergið. Snorra herbergi er þá orðið skrifstofa - og allir sáttir!
Reyndar á eftir að snurfusa smá og gera stofuna jafn fína og við viljum hafa hana en þetta er samt alveg ljómandi fínt. Sérstaklega strákaherbergið þar sem mjög vel fer um þá bræður.
Ég fór svo í svakalegustu innkaupaferð síðari ára í dag. Í kreppunni þýðir lítið annað en að skipuleggja matarinnkaup vel svo þegar é glauk við að gera mánaðarmatseðilinn var haldið í innkaup. Nú eru allir skápar fullir af mat og við tekur vinnutörn hjá öllum.
Snorri er byrjaður í leikskólanum aftur, Trausti reynir að læra að skríða, tala, standa og mata sig- svona eins og börn á hans aldri gera og ég ætla að reyna að komast í samband við leiðbeinandan minn og skipuleggja önnina sem er framundan.
Vonandi er Osló ekki búin að gleyma mér!

2009-07-27T22:39:00.003Z

...spurning um að ná öðru bloggi fyrir sumarlok

Við litla fjölskyldan - sem reyndar er ekkert svo lítil lengur - höfum það bara ágætt alveg.
Strákarnir vaxa eins og við má búast og rúmlega það.
Trausti "litli" er ekkert lítill lengur, enda verður hann átta mánaða eftir tvo daga. Hann er kominn með tvær tennur, bablar heil ósköp og borðar orðið allt sem að honum er rétt. Nema kekki og brauð. En það kemur.

Snorri fékk fiðluna sína um daginn þegar Clara vinkona mín kom í heimsókn. Við tókum eina smá kennslustund en hann er vissulega örlítið harðhentur ennþá. Spurning um að klippa út pappafiðlu svona til að byrja með.

Sumarfríinu fer senn að ljúka, ég fer í skólan og Daníel í kennslu/fæðinarorlof.
Verst hvað íslenska krónan er fársjúk og dauðvona. Það er ekki gjörningur að flytja með fjölskyldu til Noregs á meðan maður fær tekjurnar í íslenskum krónum. Eiginlega algjör hryllingur bara að hugsa til þess.
Þannig að við verðum by-costal fjölskylda þetta haustið. Eða svoleiðis. Sjáum til hvernig spilast úr þessu.

Annars sýnist mér á veðrinu hér í Eyjafirðinum að haustið sé komið...

2009-06-02T20:45:00.003Z

Jæja þá
Nú þarf að tækla aukakílóin.
Oft var þörf - nú er nauðsyn. ÞEtta er náttúrulega ekki hægt.
Það eru nokkrir vankantar á planinu.
1. Mér finnst súkkulaði mjög MJÖG gott
2. Mér finnst súkkulaði jafnvel betra í stórum skömmtum!
3. Ég er með barn á brjósti og hef þurft að hafa gríðarlega mikið fyrir því að framleiða og halda í mjólkina fyrir hann. Ef ég borða of lítið þá hverfur mjólkin - og aukakílóin, ég vil helst halda mjólkinni takk.
4. ...allar hinar afsakanirnar.

Jæja, 15 kg þurfa að fara svona til að byrja með. Þegar þau eru farin verður þessi rútína vonandi orðin að svo miklum vana að það fara svona 5-10 í viðbót, bara við daglegt líf :)
Ég er sem sagt í því þessa dagana að athuga vel hvað ég set ofan í mig, sem gengur ágætlega.
Ég er líka í Rope Yoga, sem er algjörlega málið til að koma slöppum og lítt notuðum vöðvum í form á ný
Ég er farin að notast við bráðsniðugt prógramm C25K til að komast í langþráð skokkform.
Ég fór í fyrsta "skokk" túrinn í kvöld. Sem sagt, ganga í 5 míntúru, skokka svo í 1 mín og labba í 1,5 mín til skiptis í 20 mínútur. Einfalt og gott.
Ég hafði þetta allt saman af svona þolslega séð - hafði vit á því að byrja ekki hverja skokk mínútu á einhverjum spretthlauparaæfingum og svona.
Nema hvað.
HELVÍTIS GRINDARGLIÐNUNIN!
...þetta helvíti sem ég fékk á meðgöngunni en náði ágæstis bata af með grindhvalasundinu...
Þessi skokktúr var eins og Revenge of ...THE GRINDARGLIÐNUN!!

Dauði og djöfull.

Að öðru leyti er allt gott að frétta.
Við fjölskyldan höfum það voða gott - Trausti varð hálfs árs í gær, og við náðum þá í leiðinni þeim merka áfanga að halda brjóstagjöf gangandi í hálft ár.
Ég hafði lofað sjálfri mér svaka veislu ef það gengi upp. Aldrei að vita nema ég bjóði í kaffi næstu helgi!

Myndir af þeim 6 mánaða koma kannski inn á morgun - svona ef ég nenni að hlaða inn myndunum af myndavélinni.
Annars eru hér nokkrar myndir frá Uppstigningardegi:

Rauðamelskirkja

Í Hausthúsum

2009-05-10T22:54:00.002Z

Að ala upp snillinga

Eins og stoltum foreldrum sæmir finnst okkur Daníel eins og Snorri sé gáfaðasta barn sem gengið hefur þessa jörð.
- og við höfum sannanir.

þið ignorið bara feitubolluna og draslið á myndinni. Aðalatriðið er Snorri og fyrsti fiðlutíminn. Mig vantar samt handa honum 1/10 fiðlu - ef einhver sem les þetta lumar á svoleiðis má endilega segja frá!

Trausti er svo farinn að fá að borða eins og fínn maður.
Eftirfarandi myndasería sýnir hversu áhugsamt barnið var orðið um mat... ég stóðst ekki hvolpaaugun lengur!

... og svo ein í lokin.
Við mægðin fórum í labbitúr - misstum af veðurspánni og rétt komumst heim.

2009-04-26T09:58:00.003Z

Þögnin rofin

Ég get ekki annað sagt að ég sé ánægð með kosningarnar.
Finnst Framsókn reyndar hafa fengið of mörg atkvæði en ég er ánægð með áframhaldandi vinstristjórn og meira ánægð með að Borgarahreyfingin kom fjórum mönnum á þing.
Ánægðust er ég samt með að kynjahlutfallið á þingi sé nær 50% en það hefur nokkurntíman verið, 43% er bara nokkuð gott.

Af okkur er allt gott að frétta.
Afkvæmin stækka og þroskast bæði tvö og á ógnarhraða.
Snorri svaraði mér um daginn með einföldu dissi "jess dúd" - og tilkynnti mér svo að yellow þýddi gulur. Það væri sko enska.

Trausti er nánast farinn að sitja, farinn að fá graut og svaf alla nóttina í nótt í fyrsta sinn.

Taubleyjur eru klárlega málið í þessu árferði sem hér ríkir og eins mikið og ég hlakka til að flytja til Oslóar í þrjá mánuði í vetur - svona ef hlutirnir ganga upp þá kvíði ég því hreinlega að hafa laun í íslenskum króunum. Það er alveg sama hver hefði komist í stjórn - gengið verður áfram mjög slæmt.

Við Snorri kíktum í Húsdýragarðinn á Föstudaginn Langa

Trausti er orðinn svona fullorðinn

Páskaeggin voru heimatilbúin í ár - og vöktu mikla lukku

Og inni í stóra egginu var fjársjóðskort fyrir Snorra, það vakti líka stormandi lukku

2009-02-11T12:37:00.002Z

síðasta bleyjan í bili

þessi er úr gardínuefninu sem var keypt fyrir gluggan hjá Snorra.
Kemur bara alveg jafn vel út sem bleyja og gardínur

2009-02-09T22:01:00.003Z

Kreppumamma...

Taubleyjunotkun er ákveðin fíkn.
Nú dreymir mig um marglitan stafla af fallegum (umverfisvænum, ódýrum, þægilegum fyrir Trausta etc...) taubleyjum.
Og hvað gera bændur (heimavinnandi húsmæður)þegar gengið er svo fáránlegt að það að kaupa eina bleyju frá útlöndum setur heimilisbókhaldi á hliðina...
...nú sauma bleyjur.
og ekki bara úr hverju sem er, heldur ónýtum bolum af húsmóðurinni og útsöluteppi úr IKEA (kostaði 495kr)

2009-01-29T14:33:00.002Z

Myndasíðan er aftur komin í gagnið,
elinbjork.smugmug.com
Var að setja inn janúar myndir af drengjunum og fjölskyldunni almennt. Set kannski inn jólamyndirnar líka - þegar ég hef endurheimt þær á mína tövlu ekki linux garminn sem nýttist sem "mín" tölva á meðan eplið fór í tímabundið leyfi vegna rafmagnsleysis.

Hér er allt ágætt að frétta, mér tekst ekki að klára prjónaverkefnin, er ekki komin af stað með skólaverkefnin, og hér er yfirleitt allt í drasli - en það er samt algjör lúxus að vera í svona orlofi.

Í ljósi versnandi tíðar og hækkandi gengis þá hefur hagsýna húsmóðirin aldeilis brotist út. Hér er bakað brauð í hverri viku - stundum oft. Allt prjónað sem mögulegt er og nýjasta nýtt er að sauma á börnin. Bæði bleyjur og föt.
Ég dró fram gömlu overlock vélina hennar mömmu í gær, tókst að þræða hana (Við erum að tala um fjögur kefli, fjórar nálar!) og fór að vinna í að búa til innlegg í bleyjurnar hans Trausta úr gömlum handklæðum. Vill ekki svo illa til að ein nálin bara brotnar! Á frotté efni. Þetta finnst mér lélegt.

Annars stefni ég að því að fara í æfingabúiðir til mömmu, rifja upp að setja í ermar, rennilása og gera vasa og fleira þessháttar.

2009-01-28T12:32:00.000Z

Jæja.
Við famelían drifum okkur í ikea í kvöld. Við vorum frekar sein af stað, Daníel eitthvað slappur og svona.
Nema hvað, við drifum okkur af stað einhverntíman eftir sex. Þegar við komum í Ikea er klukkan tuttugu mínútúr í sjö - og við sjáum að það lokar kl. 19
Jæja, ok, planið var bara að kaupa dáldið af efnum í smá saumaskap fyrir strákana og leyfa Snorra að fara í Smaland svo við drifum okkur inn. Smaland var enn opið svo Snorri var skilinn eftir þar og við fórum inn og ég skoðaði efnin vel og vandlega. Þegar síðan er tilkynnt að nú sé búið að loka, við náum í Snorra borgum efnin og förum út.
Það var smá snjókoma svo ég sagði Daníel að sækja bílinn og koma með hann upp að útganginum. Trausti var í lítilli kerru sem við höfum alltaf í skottinu, ég vildi ekki láta hann vera í bílstólnum í einni kös fyrst við komumst hjá því. Allavega, Ég þurfti að taka Trausta upp úr kerrunni, setja hann í bílstólinn og brjóta kerruna svo saman. Þegar ég er að þessu öllu saman legg ég efnin sem ég var að kaupa frá mér - vind mér svo í að koma barninu í stólinn og stólnum í bílinn. Þegar því var öllu lokið sest ég inn í bíl og við höldum heim á leið.
Eftir nokkrar umræður um mat ákváðum við að koma við í Hagkaup - ég stökk inn keypti það sem vantaði og við keyrum heim. Þegar Daníel leggur bílnum kviknar á peru í hausnum á mér:

VIÐ GLEYMDUM EFNUNUM FYRIR UTAN ÍKEA, Í SNJÓKOMUNNI!!

Maður er náttúrulega ekki í eðlilegu ástandi!

2009-01-17T20:03:00.002Z

Jú jú, við erum á lífi - og lífið gengur ljómandi vel fyrir sig.
Það er einhvernveginn minna um bloggtíma með tvö börn í húsinu, þrátt fyrir að annað þeirra sé bara tæplega 7 vikna. Allur tölvutími fer meira eða minna í mömmu /taubleyjuspjall og einstaka tölvupóst - svo þegar maður er rétt að komast í gírinn er einhver orðinn svangur/blautur/leiður/þreyttur...
Trausti venst nafninu sínu vel og hefur eiginlega sofið betur eftir að það var kunngjört. Hann virðist vera að detta í ágæta kvöld og næturrútínu, morgnarnir eru enn frekar misjafnir, en svo tekur hann góðan lúr í vagninum eftir hádegið. Á virkum dögum reyni ég að fara í göngutúr, og svo er auðvitað hellingur sem maður ætti að vera að nýta tímann í. Taka til, setja í þvottavél, læra og annað í þeim dúr.

Það vildi svo vel til fyrir jól að sjónvarpið okkar gaf upp öndina. Við tókum þá ákvörðun að vera ekkert að flýta okkur að kaupa sjónvarp, og þvílíka róin sem færðist yfir heimilið. Nú er bara kveikt á útvarpinu, helst Rás 1 á daginn og við horfum svo bara á það sem okkur langar í tövlunum, Snorri hefur róast mikið við þessa breytingu finnst mér, og horfir í kjölfarið mun minna á "sjónvarp".

Trausti fór í 6 vikna skoðun í síðustu viku og reyndist hafa lengst um 4,5cm frá fæðingu. Hann hafði hinsvegar ekki þyngst nema um 100 grömm á síðustu tveimur vikum svo nú er reynt að troða meiri mjólk í barnið, bæði brjóstamjólk og svo þurrmjólk á kvöldin. Það gengur ágætlega. Hann ber þess nú alls ekki merki að vera að fá of lítið, svo ég hef litlar áhyggjur af þessu. Við sjáum bara til hvernig hann verður í næstu skoðun sem er 2. febrúar.

2008-12-28T19:39:00.002Z

Trausti Daníelsson
Var skírður í dag- dagurinn hepnaðist mjög vel, við héldum upp á afmæli Snorra í leiðinni - hann fékk Íþróttaálfsköku og Trausti fékk skírnartertu.
Myndir koma síðar.

2008-12-26T00:13:00.002Z

2008-12-16T01:40:00.003Z

Hér gengur lífið sinn vanagang, við sponni erum vakandi fram yfir miðnætti - stundum alveg til þrjú en sofum líka langt frameftir á morgnanna. Snorri og Daníel dunda sér á morgnanna og eru oft ekki farnir í leikskóla /skóla fyrr en rétt fyrir hádegi. Svona afslappað á lífið að vera, allavega finnst okkur það.
Ég fattaði í gær að aðventan hefur farið dáldið framhjá mér. Heyrði það síðan í dag að hún hefði farið framhjá fleirum. Kreppan að gera útaf við hátíðarnar.
Til að létta lundina eru tvær myndir í boði síðunnar:

- svona er hægt að endurvinna maltdósir...hver þarf rándýra kubba?

- og svo þessi saklausa æska. Það er yndislegt að hafa svona kríli til að minna sig á það sem skiptir máli.

Það var ægilegt stuð hjá Snorra og Ása :-)

2008-12-07T23:30:00.004Z

Fyrsta vikan
Í fyrsta lagi - Takk fyrir allar hamingjuóskirnar!

Það er auðvitað rosaleg breyting á heimilislífinu þegar nýr einstaklingur kemur inn á heimilið. Sérstaklega fyrir þennan tæplega þriggja ára sem er vanur því að vera einn um athyglina.
Blessunarlega hefur nú allt gengið áfallalaust fyrir sig. Snorri er að átta sig á litla bróður, er mjög góður við hann og hefur sýnt honum meiri áhuga undanfarna tvo daga en dagana þar á undan. Þá vildi hann helst ekki koma við stubbinn.
Auðvitað er þetta dáldið erfitt, erfitt að mega ekki hoppa í hjónarúminu þegar sá stutti tekur allan tíman frá mömmu með þessu brjóstastússi - erfitt að þurfa stundum að kalla oftar ein einu sinni áður en honum er svarað og þess háttar, en hann stendur sig engu að síður alveg ofsalega vel, og það hefur alls ekki borið mikið á afbrýðiseminni.
Sá stutti sefur og drekkur mestan hluta sólahringsins og það er vel. Við höfum reynsluna af því að fá ekkert að sofa svo við erum afskaplega þakklát fyrir að það virðist amk. ekki vera sama rosalega magakveisan enn sem komið er - það hefur reyndar mest lítið borið á kveisueinkennum. Hann grét í einn dag í vikunni, og eftir á að hyggja hefur hann sennilega verið svangur- mamman aðeins að spara of mikið við hann í gjöfunum og gaf bara annað brjóstið í einu, hann hefur verið eins og ljós síðan hann fór að fá að súpa úr báðum í hverri gjöf.

Ætli við förum svo ekki að veita heimsóknarleyfi- en frábiðjum okkur margt fólk í einu og mikið af börnum í einu. Svo bara hringja á undan sér, ef við svörum ekki stendur bara ekki nógu vel á.
Ég hef hlaðið nokkrum myndum inn á flickr síðuna sem ég er með - þetta eru bara venjulegar heimilismyndir, ekkert artí fartí flickr-standard dæmi, en mér finnst þær fínar. Þarna inn 'á milli er svo prjónadótið mitt, en það vill svo til að ravelry, sem er einskonar facebook prjónafólks nýtir flickr sem mynda-client, ekkert annað...

Fyrsta baðið - Snorri tók myndina!

href="http://farm4.static.flickr.com/3280/3090234039_db655a1065_m.jpg">

2008-12-02T13:20:00.002Z

Fullveldisbarn
Að fæðast á 90 afmæli fullveldisins er hreint ekkert slor.

Lítill drengur kom í heiminn kl. 03:19 þann 1. desember eftir stutta og fremur einfalda fæðingu sem gekk vonum framar. Liður 1 í planinu " Allt á eftir að ganga alveg súper dúper vel" er sem sagt success.

Litli drengurin er langur og mjór og svipar frekar til pabba síns en annara. Hann var 3575 grömm, eða 14 merkur og 54 cm. Okkur heilsast mjög vel - og samanborið við fæðingu Snorra líður mér ekkert eins og ég hafi verið að fæða barn. Það verður að teljast jákvætt.

2008-11-29T20:15:00.002Z

41 vika

Hér er lítið að gerast. Það merkilega gerðist reyndar í nótt að ég svaf ekki neitt. Sat og prjónaði sokka í staðinn - og hlustaði á ofurmúsina krafsa í vegginn í eldhúsinu.

Ási spyr hvort ég geti ekki komist í ganga upp og niður tröppur og svona... svarið er einfalt - ábyggilega, en ég lærði það síðast að allar þessar tilraunir til að ganga barnið út gáfu ekkert af sér nema þreytu svo ég hef tekið þann pól í hæðina að slaka bara á núna - krakkinn kemur þegar honum sýnist. Snorri er fæddur 9 dögum eftir settan dag, svo þessi hefur enn 2 daga til stefnu. Og það veit guð - og allir sem eitthva umgengust okkur skömmu eftir fæðingu Snorra að okkur hefði sko ekki veitt af hvíldinni!

Bakaði annars sörur í gær svo allir velkomnir í kaffi.

2008-11-25T00:30:00.001Z

Hér sit og ég prjóna jólagjafir í akkorði, á milli þess sem ég fóðra ungan á malti og súkkulaði... Segjum bara að það sé alveg vika í grísling. Fékk amk. aftur mæðraskoðun á mánudag...
Sem er ágætt, við þurfum sennilega vikuna til að veiða húsdýrin. - Mýsnar sem sagt. Ég átti alltaf eftir að klára söguna um Ofurmúsina sem snéri aftur... it's coming folks

2008-11-21T00:45:00.002Z

Hér er ég enn

Og ekkert barn- náði að sturta mig í svefnhæft ástand- kl. 3 um nótt, ætli aðrir íbúar hússins hafi ekki verið rosalega glaðir með sturtuferð svona um miðja nótt... en jæja ég sem sagt sofnaði, vaknaði verkjalaus og talsvert betri í maganum.

Gígja ljósa hafði á orði að fyrst krakkinn spíttist ekki út í uppkasts-átökunum þá sé hann ekkert á leiðinni. Ég bíð bara hin rólegasta fram undir mánaðamót og legg á meðan drög að heimatilbúnum jólakortum og heimaprjónuðum jólagjöfum.

40 vikur á laugardaginn. - Eigum við ekki að segja að það séu þá 12 dagar í Grísling II.

2008-11-18T02:57:00.003Z

39 vikur - og nokkrir dagar til

Ekkert barn, mér hinsvegar tókst að næla mér í matareitrun, nú eða vírusinn sem Snorri er með og hef því skilað bæði kvöldmatnum og kvöldsnarlinu frá mér og er með samdrætti - sem að öllu jöfnu væri fagnaðarerindi, en ekki í þessu tilfelli. Það eina sem þeir gera er að halda fyrir mér vöku!

Núna er akkúrat sá tímapunktur sem ég nenni ekki að vera ólétt!

2008-11-14T00:32:00.003Z

Snorri snillingur
Hann Snorri er auðvitað skemmtilegasta og fallegasta - og sniðugasta barn sem býr á jörðinni. Klárlega. En það sem meira er - hann er líka bráðklár. Á allra mælikvarða. Ekki bara okkar foreldranna. Fyrir þá sem ekki eru með á nótunum verður hann 3 ára á Jóladag næstkomandi. En í dag, þá stafaði hann nafnið sitt. Án aðstoðar, og pikkaði það inn á tölvuna mína. Hann komst svo langt með Daníelsson.

Fyrir nokkrum vikum síðan fórum við að fara markvisst yfir stafrófið með honum. Hann var byrjaður að spyrja um stafina, við sögðum honum hvaða staf hann ætti - mamma og pabbi og þessháttar, og furðufljótt var hann kominn með mest allt stafrófið á hreint. Á einni helgi lærði hann svo að syngja bæði erindin af ABCD - og núna er uppáhalds iðjan hans að setjast við tölvu og við setjum upp notepad, text edit eða annað svipað forrit, og svo setur hann fram orð sem hann vill skrifa - og við stöfum. Leikurinn fór þannig fram:

Snorri: Má ég skrifa Lína Langsokkur
Annað foreldri: Já, þá er fyrst L, Línu stafur
Snorri: ókei (pikkar inn L)
Annað foreldri: svo kemur Íþróttaálfsstafur
Snorri: ókei...

... og svona heldur þeta áfram. Nema hvað, fyrir nokkrum dögum prufaði ég að hætta að tengja stafina við persónur, sagði bara L, Í, A og svo framvegis... og í dag þá spurði ég hann hvort hann gæti skrifað nafnið sitt, og hann sem sagt skrifaði (pikkaði)

SNORRI DAN - og svo vantaði hann smá hjálp.

Ég geri mér fulla grein fyrir því að þetta er montpistill og ekkert annða. En ég má líka alveg monnta mig af barninu. Annað væri að nú!

2008-11-12T19:58:00.002Z

Tókst!

Var í vinnu frá 9-14 í dag, og náði að klára, og hreinlega pakka niður skrifstofunni!
Það hjálpaði heilmikið að yfirmaðurinn var ekki við til að skipta um skoðun enn einnusinni og setja mér meira fyrir.

Sem sagt, komin í barneignarfrí. Næstu dagar og vikur fara í almenna leti, prjón, át og svefn. Svo kemur grílsingur bara þegar honum hentar. Verður nú ekki fyrr en undir mánaðarmót ef hann líkist stóra bróður eitthvað!

2008-11-11T18:26:00.003Z

Já nei. Þetta var ekki síðasti vinnudagurinn. Lítur út fyrir nokkrar klst. á morgun.
Eins gott að ég verði hætt á fimmtudaginn. Þá á ég tíma í mæðraskoðun og verð að öllum líkindum þokkalega skömmuð fyrir að hafa ekki hunskast til að hætta þegar ég átti að hætta.

framhald á morgun.

2008-11-11T09:34:00.003Z

Hvað er eiginlega með þessa þingmenn okkar?
Þeir stela frá ríkinu, keyra fullir, blogga seint og síðla um nætur með persónuárásir sem útgangspunkt, helmingurinn talar ekki ensku, mig grunar að hinn helmingurinn kunni þá ekki norðurlandatungumál - þeir slugsa við áætlanagerð og boða blaðamannafundi til þess eins að kalla fréttamenn dóna og fíbbl. Það nýjasta í plottinu er svo að þeir kunna ekki á tölvupóst.

Svo kvarta þeir yfir því hvað Alþingi er valdalaust... spurning um að velja næsta Alþingi og ríkisstjórn af handahófi upp úr símaskránni.

2008-11-10T21:20:00.002Z

Í síðustu viku hljómaði planið þannig að ég ætlaði að vinna út þá viku, og fara svo í barneignarfrí. Hvað gerðist? Jú, ég fékk ógeðis heljarinar flensu og var hálf meðvitundarlaus í fjóra daga eða svo. Druslaðist til vinnu á föstudag en kom fáu í verk. Er enn frekar lumpin en vann samt 8 tíma í dag, og er ekki enn búin með það sem þarf að klára. - Í ofanálag er yfirmaðurinn alltaf að finna eitthvað nýtt sem hann þarf endilega að fá mig til að klára, og lætur eins og ekkert sé sjálfsagðara. - Ofan á það er ég komin rúmlega 38 vikur þannig að tæknilega séð gæti gríslingur farið að láta sjá sig. Þó ég hafi nú ekki mikla trú á því.

Allavega, er sem sagt ennþá ólétt, ennþá veik og ekki enn komin í barneignarleyfi - þrátt fyrir læknisvottorðið.

Í ofanálag er ég að fá endajaxl og fékk svo bólu á nefið þar sem ég snýti mér mörghundruð sinnum á dag þessa dagana...

Pant vinna síðasta - og þá meina ég SÍÐASTA!! Daginn á morgun!

2008-11-05T16:56:00.001Z

Okursíðan

Endilega skoðið okursíðu dr. Gunna sem oftast- maður getur sparað helling á því að vera dáldið meðvitaður þessa dagana...

2008-11-05T12:46:00.000Z

Bestu fréttir dagsins?

Ég bara veit ekki hvor fréttin gleður mig meira

Græna skrímslið til sölu eða Obama næsti forseti Bandaríkjanna.

2008-10-31T23:16:00.002Z

Það er ábyggilega margir að standa sig vel í kreppunni - en mig langar sérstaklega að benda á Sinfóníuhljómsveit Íslands sem er að skipuleggja tónleika út um allt land - Höfn, Eskifirði, Akureyri og Reykjavík - við Reykvíkingar höfum þegar fengið okkar fríu tónleika, á Akureyri kostar þúsundkall og með í kaupunum fylgir Kristján Jóhannsson, og frítt er á tónleikana fyrir austan. Það er líka hægt að fara á tónleika með téðum Kristjáni hér í Reykjavík á morgun fyrir þúsundkallinn. Endilega nýtið ykkur þetta.
Aðrir sem hafa verið að standa sig mega vel í kreppunni er Össur , sem í dag greidd út 100.000kr kaupauka til allra starfsmanna á Íslandi, því fyrirtæki skilaði hagnaði fyrirtækið vill standa á bak við sína starfsmenn þegar svona árar. Þau fyrirtæki sem eru að lækka laun starfsmanna sinna ÁN þess að vera í fjárhagsörðuleikum ættu að taka sér Össur til fyrirmyndar!

2008-10-28T14:27:00.002Z

Músaveiðar á Þjórsárgötu

Munið þið eftir þessu? - partur tvö, "Ofurmúsin snýr aftur" er væntanlegur...

2008-10-21T00:45:00.004Z

Mér finnst íslenski fáninn afskaplega fallegur. Hvar sem ég er í heiminum finnst mér fáninn minn alltaf fegurstur allra fána. Það hins vegar fer ekki vel í mig að fyrirtæki sem hingað til hafa rúið íslenskar fjölskyldur inn að skinni með verðsamráði, fáránlegum álögum og með því að eyðileggja algjörlega verðskyn neytenda taka fram fallega fánan og flagga honum í stað fyrirtækjafánans til að efla samkennd eða þjóðarstolt þjóðar sem er á barmi gjaldþrots. Það gerir mig alveg brjálaða að fyrirtæki, hvurs forstjóri nýtti sér ringulreið og sjokk almennings til að lýsa því yfir að olíuskortur væri yfirvofandi og benti fólki eindregið á að koma og hamstra bensín og olíu - koma og versla sem mest þegar óvíst var hvort þetta sama fólk væri búið að missa ævisparnaðinn til Baugs eða Björgúlfsfeðga að guð má vita hverra vefji aumum sölubrellum og áróðri inn í fánann og telji viðskiptavinum sínum og öðrum trú um að þetta sé allt gert með hag almennings fyrir brjósti. - Að Eimskip og síðar Flugfélag Íslands og svo ábyggilega fleiri fyrirtæki hafi svo apað vitleysuna upp gerir mig ekkert hressari. Ég á svon von á því að hvað úr hverju fari þjóðsöngurinn, Ísland farsælda frón og Ísland ögrum skorið að belja hátt og snjallt úr hljóðkerfum stórverslana og verslunarmiðstöðva. Þá hætti ég endanlega að nenna í búðir.

Annars gerðumst við þjóðleg hér á Þjórsárgötunni og átum kofareykt bjúgu og íslenskar kartöflur með uppstúf í kvöldmatinn. Mjög mikil þjóðremba í gangi. Uppstúfið reyndar úr spelti og sojamólk, en ekkert verri fyrir vikið.

Annars lítur gríslingur svona út núna. Belgingur er sennilega betra orð.

2008-10-18T09:02:00.002Z

Forsetakosningar

Amerískir vinir mínir eru mis pólitískir - og þó ég viti að sumir þeirra hafa sterkar skoðanir eru ekki margir þeirra sem hafa bloggað um komandi forsetakosningar. Jimmie vinkona mín skrifaði um málið í dag, og krækti á mjög svo áhugaverðan pistil frá bloggara sem ég veit engin deili á - en pistillinn er skemmtilega uppsettur og segir allt sem segja þarf um ameríska pólitík þessa dagana.

2008-10-13T09:27:00.002Z

34 vikur og 2 dagar - aðeisn 40 dagar eftir.

Það er nefninlega það.

Eins gott að maður er aðeins farin að huga að undirbúningi - ég á eftir að verða steinhissa þegar ég loksins fer af stað, að það sé raunverulega að koma að þessu. Finnst enn eins og þetta sé bara að fara að gerast eftir einhverja mánuði...

Annað í þessum dúr - mikið er ég fegin að við tókum taubleyjuákvörðunina... vitiði hvað bleyur kosta í dag?? New born bleyjur kaost 700kr í Bónus, 1400kr í Krónunni skillst mér svo snarhækkar þetta eftir því sem bleyjurnar stækka. Mig grunar að verðið eigi ekki eftir að lækka neitt á næstu vikum...

2008-10-10T20:56:00.002Z

Snorri sagði leikskólakennaranum sínum sögu í dag. Hann sagði að við værum að flytja úr húsinu okkar, á til tunglsins. En reyndar ekki alveg tunglsins heldur næstu plánetu við. Og þar ætlum við að búa og borða avocado.

Þetta er sennilega ekki það vitlausasta - svona í kreppunni...

2008-09-29T20:26:00.002Z

Heyrt þegar Snorri er að fara að sofa:

Þeir feðgar syngja nokkur lög

..."að leita sér lamba.."

Snorri: hvað er leita sér lamba??

..."hafið bláa hafið hugan dregur"

Snorri: Hvað er hugan dregur??

Svipað heyrist þegar horft er á Tinna eða Tomma Togvagn

" og þá kom babb í bátinn"

Snorr: Babb í bátinn? Hvað er babb mamma, hvað kom í bátinn??

Jamm, svona er að vera næstum þriggja ára stubbur.

2008-09-28T15:33:00.003Z

Það er ekkert barn komið - svona fyrir þá sem voru farnir að hafa áhyggjur. Ég má reyndar lítið sem ekkert gera þá fæ ég verki og samdrætti og eitthvað vesen. Mér sem finnst ég ekkert gera nema ekki neitt. - Daníel er því ábyggilega sammála!

Það safnast annars í sarpinn þetta dót sem vantar - eða þurfti að sækja úr láni hingað og þangað um bæinn. Við erum svo sem komin með allt þannig séð, bara svona pjatt sem er eftir - klára heimferðagallann og svo langar mig voða mikið í svona burðarsjal - eigum burðarpoka sem var samt eiginlega ekki hægt að nota á Snorra fyrr en hann var orðinn dáldið stálpaður. Sé fyrir mér að þetta gæti verið súper þægilegt t.d. um jólin...

Svo er planið að prufa taubleyjur - svo ég fór í Þumalínu í gær og bað um að vera frædd um taubleyjur. Það kom ljómandi vel út og planið mitt -einfalt og ódýrt- gengur upp amk. fyrstu vikurnar svona á meðan við erum að ákveða hvort við látum verða af þessu eða ekki. Sem er fínt, nú þarf bara að kaupa nokkrar taubleyjur, þær hafa aðeins týnt tölunni þessar sem voru keyptar fyrir þremur árum.

Við fórum í réttir fyrir hálfum mánuði eða svo og Snorri auðvitað hafði mikið gaman að því, og fékk t.d. að prufa eitthvað nýtt, þ.e. að fara á hestabak. Honum fannst það ekkert leiðinlegt.

2008-09-25T10:14:00.002Z

Contractionmaster.com

Er síða sem kom sér vel í gær. Ég fór að finna fyrir samdráttum upp úr kl. níu og fannst þeir eitthvað undarlega reglulegir. Gafst loks upp á að nota skeiðklukkuna á símanum mínum því þetta voru dáldið margir samdrættir svo ég prufaði að nota timerinn á þessari síðu sem ein ólétt vinkona mín hafði bent mér á.

Það kom í ljós að hver samdrattur var uþb 40-60 sek og á sirka 4-5 mínútna fresti. Þetta gekk á í allt gærkvöld og hætti ekki fyrr en í nótt. Ég hringdi nú ekki upp á fæðingardeild enda engir verkir með herlegheitunum. En það sem barnið djöflaðist á meðan, ég hélt á tímabili að hann ætlaði að sparka sig út úr kúlunni. Ég hótaði honum hinsvegar með því að það er ekkert tilbúið fyrir hann - og ef hann kemur núna þá á hann ENGIN föt sem passa!

10:47:07 pm 10:48:02 pm 54 secs 3 mins, 26 secs
10:43:40 pm 10:44:18 pm 38 secs 3 mins, 26 secs
10:40:13 pm 10:40:59 pm 45 secs 4 mins, 22 secs
10:35:51 pm 10:36:55 pm 1 mins, 4 secs 2 mins, 56 secs
10:32:55 pm 10:33:40 pm 45 secs 3 mins, 31 secs
10:29:22 pm 10:30:19 pm 57 secs 5 mins, 50 secs
10:23:32 pm 10:24:28 pm 55 secs 3 mins, 5 secs
10:20:28 pm 10:21:28 pm 1 mins, 0 secs 4 mins, 22 secs
10:16:05 pm 10:16:51 pm 44 secs 5 mins, 0 secs
10:11:03 pm 10:12:03 pm 59 secs 5 mins, 18 secs
10:05:45 pm 10:06:33 pm 47 secs

Daníel skipaði mér að vera heima í dag, ég var svo sem sammála. Nú bíð ég bara eftir að heyra í ljósunni minni -svona til að vera viss.

2008-09-23T11:00:00.003Z

Ætlarðu að hlýða?

Snorri er auðvitað eins og önnur börn á hans aldri, mikið að reyna á þolrif foreldra sinna. Hann fær oft að heyra setningar eins og "á ég að slökkva á Línu?", "Ætlarðu að vera góður?", "Nei það er ekki í boði núna"

Undanfarna daga hafa svo heyrst úr herberginu hans: Knútur ætlar þú að hlýða?? Nei Knútur það er ekki í boði núna!

Þá er Snorri að ala upp ísbjörnin sinn, Pandabjörnin hans sem ekki heitir annað en pandabjörninn fær líka að kenna á því stundum. -En mér sýnist uppeldið nú ganga ágætlega hjá barninu.

2008-09-22T23:17:00.002Z

Gullkorn

Snorri á þvílíkt af gullkornum þessa dagana en ég man ekkert akkúrat núna - hélt ég hefði byrjað á pósti um þetta sama efni um daginn en finn hann ekkki núna.

Allavega, hann er mikið að spá í litla bróður sem er í mallanum á mömmu. Hann vill helst að litli bróðir heiti Árni Daníel eins og litli bróðir Bergþóru Eddu (frænka). En öll barbanöfnin koma líka til greina. Svo um daginn var hann að segja sögu... einusinni þegar ég var lítill í mallanum á mömmu minni setti mamma mig bara niður í jörðina og svo bara kom ég upp úr jörðinni!

Aðeins verið að rugla því hvernig barbabörnin komu til við komu litla bróður - og sína eigin.

Svo lærði hann nýlega að nota "til dæmis". Svo núna bullar hann meira en góðu hófi gegnir - og svo þegar ég spyr, hvað er blablabla Snorri? Sko mamma það er til dæmis þegar.... eða til dæmis þegar ég ...

Æðislegt og ofsalega fínt eru líka nýyrði í orðaforðanum og eiga merkilega oft við um kvöldmatinn.

Snorri ætlar svo að vera mjög góður við litla bróður, hann ætlar til dæmis að leyfa honum að sofa í vagninum sínum og lána honum dótið sitt. En honum fannst líka mikilvægt að máta peysuna hans, svona til vonar og vara (sjá hér fyrir neðan). Lopapeysan hans Snorra er hinsvegar tilbúin og hann fékkst til að fara í hana í morgun eftir "horror mátun" í gær þar sem hann vildi endilega máta peysuna, óþvegna bara á nærbolnum, sem sagt, fannst hún stinga helst til of mikið. Ég mátti múta barninu með kexi í morgun til að fá hann til að fara í peysuna - sem gekk eftir og ég veit ekki betur en hann hafi farið í flíkina án mútuþægni í leikskólanum.

og bara af því að mér finnst gaman að myndum af stráknum mínum er hér ein í viðbót!

2008-09-20T10:26:00.002Z

9 Vikur

Jæja, samkvæmt borðanum hér á síðunni á ég 9 vikur eftir af þessari meðgöngu. Þetta hefur gengið ólíkt hraðar en sú síðasta. -Reyndar get ég sennilega reiknað með að eiga amk. 10 vikur eftir en þessi +1 vika fer kannski bara í gæluverkefni sem mögulega væri gaman að klára... en ekkert svona absalút nauðsynlegt.

Það eru nú góðar fréttir að ég kem sennielga ekki til með að þurfa að liggja fram á gangi á fæðingardeildinni að eiga barnið - og þarf ekki að hafa áhyggjur af því að vera send heim eftir 6 tíma. Sem er vissulega gott. Nú er bara að vona að unglæknar fari ekki í verkfall, hver á þá að gefa mér dópið?

Snorri bíður annars óþolinmóður eftir litla bróður, finnst hann greinilega aldrei ætla að koma. Honum var hætt að lítast á prjónaæðið á þennan ósýnilega litla bróður svo ég tók á það ráð að prjóna sokka og vetlinga handa Snorra. Sem hann var gríðarlega ánægður með. Svo ákvað ég að prjo´na á hann nýja lopapeysu. Allar peysurnar hans eru orðnar frekar litlar og þröngar -og svo hef ég bara ekki prjónað á hann peysu síðan hann var í kúlunni á sínum tíma. En Snorra finnst þetta peysuprjón alveg óþarfi. Hann hefur ákveðið að gefa Bergþóru Eddu frænku sinni peysuna - hann segist eiga peysu sem er alveg nógu fín...

Svo tók hann líka upp á því í fyrradag að máta peysu sem ég var að prjóna á grisling II, útkoman var þessi:

2008-09-12T10:37:00.004Z

Djöfull er ég ógeðslega fokking brjál út í fjármálaráðherra!!

"Þetta er það eina tillegg sem hann hefur til þessarar umræðu," sagði Guðlaug Einarsdóttir formaður LMFÍ um stefnu fjármálaráðherra á hendur Ljósmæðrafélagi Íslands.

Ljósmæðrafélagið fundaði fyrir skömmu með lögmanni sínum og þeim ljósmæðrum sem sögðu upp störfum í lok júní vegna stefnu fjármálaráðherra þar sem farið er fram á að Héraðsdómur lýsi þær uppsagnir ólögmætar.

Málið verður flutt í Héraðsdómi í næstu viku og ræddu ljósmæður við lögmann sinn um málið.

„Uppsagnirnar eru á einstaklings basis og hver og ein ljósmóðir hefur sagt upp á sínum forsendum," sagði Guðlaug. „Það er í valdi hverrar og einnar ljósmóður að draga uppsögn sína til baka, ekki félagsins.“

Gildismatið er síðan 1962

Guðlaug sagði að megnið af uppsögnunum komu í kjölfar mikils hitafundar í lok júní. „Gunnar Björnsson formaður samninganefndar ríkisins var inntur eftir því hvort afstaða hans til krafna ljósmæðra við launaleiðréttingu hefði breyst við að heyra kröfurnar. Þá sagði hann að afstaða samninganefndar ríkisins hefði ekki breyst síðan 1962. Þar höfum við loksins skýringu á því hvað fulltrúar fjármálaráðuneytisins með eðli starfa en ekki menntun en það er það sem hann vill launa fyrir og það gildismat er síðan 1962 og ef þetta gerir ekki hverja manneskju brjálaða sem heldur virkilega að öll kvenna- og jafnréttisbarátta síðastliðin 50 ár hafi verið til einhvers, þá veit ég ekki hvað,"sagði Guðlaug."

Upprunalega fréttin á mbl.is

*Eins og áður hefur komið fram er formaður samningarnefndar ríkisins framkvæmdarstjóri starfsmannaskrifstofu fjármálaráðuneytisins
*Fjármálaráðherra, sem er dýralæknir með jafnlangt nám og ljósmæður á bakinu metur það hærra í krónum talið að draga kálf úr belju en að taka á móti mannfólki.

Er það bara allt í lagi? Hvar eru hinir ráðherrar ríkisstjórnarinnar? Já eða bara ríkisstjórnin? Afhverju sést bara undir hælana á þessu liði á meðan ég og einhver hundruð annara kvenna í minni stöðu þurfum að láta okkur nægja enga, eða í besta falli skerta þjónustu tvo daga í viku?

Æj, þetta er ekki gott fyrir blóðþrýstinginn. Ekki það að ég gæti talað við ljósuna um hækkandi blóðþrýsing. Hún er nefninlega í verkfalli...

2008-09-04T12:50:00.003Z

Forgangsröðunin...

Við lítinn fögnuð sambýlismannsins sló ég því fram í vikunni að ef verið væri að semja við umönnunarstétt sem sérhæfði sig í ummönunn á körlum þá væri löngu búið að semja. Án þess að fara út í smáatriði, þá vorum við ekki sammála um þessa staðhæfingu mína.

Það vekur hins vegar athygli mína að lesa frétt um umræður um verkfall ljósmæðra á Alþingi í dag

Tekið af ruv.is
Það vakti athygli að aðeins einn karl tók þátt í umræðunni um kjaradeilu ljósmæðra en sex konur. Auk þeirra véku tveir karlkyns þingmenn vinstri grænna stuttlega að ljósmæðrum áður en þeir ræddu um innflutning á hráu kjöti.

Er þetta ekki bara dæmigert?

(það er samt gott til þess að vita að konur og ófædd börn landsins komast örlítið ofar í forgangsröðunina hjá téðum þingmönnum en hrátt kjöt, við komumst greinilega ekki að hjá hinum mikla fjölda kk. þingmanna stjórnarflokkana)

2008-09-03T13:49:00.004Z

Brotin loforð
Mér finnst alveg með ólíkindum að ljósmæður skuli þurfa að beita verkfalli til að fá laun sín leiðrétt. - Sérstaklega þegar um er að ræða kvennastétt sem eingöngu þjónar konum og ungabörnum. Maður hefði haldið að það væri nóg fyrir þær að benda á klausu í stjórnarsáttmálanum sem á sínum tíma var mjög mikið auglýst.

Forsætisráðherra vill meina að hér sé ekki kreppa - fyrr en greinilega það kemur að því að leiðrétta laun kvennastétta. Í samninganefnd ríkisins eru 15 manns, 10 karlar og 5 konur - formaður nefndarinnar er jafnframt ráðuneytisstjóri í fjármálaráðuneytinu, þar sem hann er einmitt með karl-yfirmann. Forsætis og Heilbrigðisráðherrar eru báðir karlkyns. Samninganefndin hefur umboð sitt frá þessum mönnum og ljósmæður hefur lýst nefndinni sem svo að hún sé algjörlega áhugalaus um að semja.

Hvernig stendur á því að mat á námi ljósmæðra til launa er enn við það sama og það var í kringum 1960 þegar ljósmæðranám var 6 mánaða nám eftir gagnfræðapróf? Hvernig stendur á því að verkfræðingar sem vinna fyrir ríkið og hafa að jafnaði 3 ára BS próf og svo masterspróf séu með 30% hærri grunnlaun en ljósmæður sem eru með 4 ára BS próf og 2 ára sérnám? - Bara af því að það heitir embættispróf en ekki master?

Hvernig stendur á því að heilbrigðisráðherra hefur það eitt um máli að segja að hann sé ekki úrkula vonar um að semjist fyrir verkfall - þegar næsti fundur á milli ljósmæðra og samningarnefndar ríkisins hefur ekki verið boðaður fyrr en EFTIR að verkfallið skellur á? Það er meiri andskotans áhuginn á einni einni mikilvægustu stétt heilbrigðisgeirans - sem reyndar, snýr eingöngu að konum.

Hvar stendur hnífurinn í kúnni? Má ekki leiðrétta launaröðun ljósmæðra af því að þá fyrst fer allt til helvítis í fjármálum landsins? Er verið að nota sömu afsökunina og var notuð sem mest til að gagnrýna Steinunni Valdísi fyrverandi borgarstjóra þegar hún tók sig til og hækkaði laun leikskólastarfsfólks. Hún var talin brjáluð, allir myndu vilja fá launahækkun og svo framvegis. Ég hef ekki séð að það hafi orðið mikið um vandræði eftir þá hækkun, - nema kreppuna (sem reyndar er ekkert kreppa smk. forsætisráðherra) megi rekja til þessarar hækkunar.

En það má henda 50 milljónum í handboltan, fresta því endalaust að leiðrétta eftirlaunakerfi þingmanna svo þeir mega þyggja laung og eftirlaun á sama tíma, spandera einhverjum hundruðum milljóna í loftvarnaræfingu og borga undir maka ráðherra og ráðuneytisstjóra í tvígang til Pekíng - ég hef ekki heyrt af því að minn maki fái að ferðast með mér á kostnað ríkisins þegar ég ferðast á vegum vinnunnar.

Kannski er ástæðan sú að það eru til tveir ríkiskassar. Einn sem ríkisstjórnin sækir fjármagn í gæluverkefni og launahækkun handa sjálfri sér, þetta nauðsynlega - og svo hinn, sem er alltaf tómur en þegar að því kemur að hann fyllist þá á sko að taka á því í mennta, heilbrigðis og félagsmálum.

2008-08-31T00:49:00.003Z

illa upplýstir blaðamenn

Á visir.is er frétt um Fellibylinn Gústav sem eins og er hringsólar yfir Kúbu á leið sinni inn á Mexico flóann. Hann sækir í sig veðrið, í orðsins fyllstu merkingu og verður án efa orðin 5. stigs fellibylur á morgun. Neðst í fréttinni stendur hins vegar:

"Þá virðist fellibyljatímabilinu ekki að vera að ljúka við Norður-Ameríku því fregnir berast af því að hitabeltisstormurinn Hanna sæki nú í sig veðrið í Karíbahafi."

Einhver þyrfti að upplýsa fréttamenn almennt um fellibyli, en fellibyljatímabilið á þessum slóðum, þ.e. Norður Atlantshafinu er almennt talið frá 1. ágúst til 30. nóvember ár hvert, 97% fellibyljana verða til á "háannatímanum" 15. ágúst til 15. nóvember. Annars eru fellibylir mögulegir allan ársins hring - eða svo gott sem, en við heyrum yfirleitt aldrei af stormum sem t.d. fylgja monsoon rigningum á Indlandi - ef þeir skella ekki á strönd Ameríku er fátítt að við heyrum af þeim í fréttum.

Ég hef annars fylgst ansi náið með Gustav í dag og hann dýpar fremur hratt. Var 955mb um kl. 17 en núna kl. 01 er hann kominn niður í 941. - Samt var hann að fara yfir Kúbu og hefði því átt að hægja aðeins á sér.

2008-08-30T21:36:00.002Z

Stórt einkafyrirtæki sem ég hætti nýlega að vinna hjá reyndi eftir fremsta megni að hafa af mér orlofið mitt. Ég var launþegi en ekki verktaki, sem til að byrja með var frekar erfitt að fá í gegn en þegar ég ákvað að hætta vegna nokkura mismunandi ástæðna þá var mér sagt að ég ætti ekkert orlof inni vegna þess að starfsmenn í hlutastarfi fá orlof greitt með launum. Og NB ekki sem sérgreiðslu með launum í hverjum mánuði heldur "inni í launatölunni".
Ég læt nú ekki vaða yfir mig alveg á hverjum degi svo ég streittist við og heimtaði auðvitað orlofið. Það var ekki fyrr en ég hringdi í VR og fékk grun minn staðfesta, það væri sem sagt verið að svindla á mér. ég sendi svo frekar pena línu á fyrverandi yfirmann minn þar sem ég sagði frá því að ég eigi tíma hjá kjaramálafulltrúa á þriðjudag, og sú sem ég talaði við sagði þessa stefnu fyrirtækisins "bölvaða dellu", þ.e. að starfsmenn í hlutastarfi hefðu önnur réttindi en starfsmenn í fullu starfi.

Skömmu síðar kom svar "við höfum ákveðið að greiða þér orlof" -eins og það sé verið að gera mér einhvern svakalegan greiða. Að nenna svona rugli fyrir nokkra þúsundkalla - og kalla það svo greiða við mig að greiða þá loksins út. Djöfulsins dónaskapur!

2008-08-27T18:39:00.003Z

Öppdeit

Osló var ágæt, Köben var frábær - þakka innilega fyrir gistingu og fæði bæði á Hovsetervej og Ráðmannsgötunni!

Það gekk allt vel í Osló, í sambandi við skólan þ.e. Að t.d. bara komast leiðar sinnar er frekar flókið stundum, og það reyndist mér sérstaklega erfitt að navigera lestarkerfið á aðalbrautarstöðinni þegar skiltin bara hætta að birtast - án þess þó að maður sé kominn á leiðarenda!

Ég hélt alltaf að Íslendingar væru slóðar í skipulagningu. Það kom í ljós að Norðmenn eru ekki mikið skárri. Og tilætlunarsemin að allir tali norsku er dáldið merkileg líka.

Yes, I'm Elín Björk Jónasdóttir and I need some information about registration and payment info. ..

Einhver norsari sem varð fyrir svörum: Yes, well, first you need to log onto studentweb with your prelimenary födselsdagsnummer, og den skal bla bla bla

Þetta var mjög áberandi, fyrsta setning á ensku næstu fimm á norsku - eða þangað til ég komst að og bað um að síðustu fjórar setningarnar væru endurteknar á ensku. - og í leiðinni benti á að ég hefði ekki lært norsku á síðustu þremur mínútunum.

Í ofanálag varð svo lítið úr þessum skyldufyrirlestrum sem ég átti að mæta á, einfaldlega vegna þess að dagskráin sem hafði verið hengd upp í Geofysik húsinu gerði einfaldlega ekki rá fyrir Met/Os nemum (veður og haffræði sem sagt)

En þrátt fyrir þetta náði ég að skrá mig í áfanga, finna út og skilgreina verkefni með Jóni Agli, koma mér nokkuð vel fyrir hvað varðar pappírsvinnuna og svo var líka dáldið gaman að kynnast kampusinum. Svona þegar ég var komin yfir mesta Oklahoma söknuðinn, þar sem allt var vel skipulagt og ég þekki hvern krók og kima.

Nú er hinsvegar eymingjaástand á frúnni, grindargliðnunin er að fara dáldið illa með mig, og svo gerði ég mér lítið fyrir og þrumaði vinstri löppinni í símabekkinn sem stóð úti á miðjum gangi í gær og nú skarta ég tvöfaldri blárri stórutá - og enn meiri verkjum í fætinum. Verkirnir virðast þó vera algjörlega háðir því hvað ég labbba/vinn mikið og eru nú eigilega farnir núna þegar ég hef setið með tærnar uppi í loft í rúminu síðan um kl. 16 í dag.

2008-08-22T18:51:00.001Z

Afsakið orðbragðið en..

Djöfulsins gargandi snillingur er Ólafur Stefánsson - já og bara landsliðið allt!

2008-08-17T19:53:00.004Z

til að lífga aðeins upp á ekki-óléttu-bloggið

Rúmar 26 vikur. Styttist óðum í grisling, ósköp minimal undirbúningur í gangi. Ég er aðallega í því að prjóna á sjálfa mig þessa dagana og aðrar framkvæmdir eru svo sem meira miðaðar að hlutum eins og eldhúsi og hurðum en ekki einhverju sem kemur til með að nýtast gríslingi eitthvað sérstaklega. - Nema reyndar kommóðan sem Daníel keypti í Góða hirðinum og er að gera upp. Sem sagt. Grislingur fær fötin hans bróður síns og eina uppgerða kommóðu. Enda er ekki pláss fyrir meir hér á Þjórsárgötunni.

Allt of snemma í fyrramálið fer ég hinsvegar út á flugvöll og til Oslóar til að hefja mastersnám. No time like the present.

2008-08-16T23:54:00.002Z

Mömmusamviskubitið

Snemma á mánudagsmorgun þá flýg ég til Osló þar sem ég verð fram á fimmtudag til að hefja mastersnámið mitt. Á fimmtudagskvöld fer ég svo til Kaupmannahafnar til Ása til og verð þar fram á mánudag bara að dúlla mér.

Þegar ég pantaði ferðina þá var rándýrt að koma heim á föstudag eða laugardag svo ég ákvað að vera fram á sunnudag, þegar mér svo datt í hug að fara til Köben þá ílendgdist ég fram á mánudag - svona til að fá sem mest fyrir peninginn - og líka til að fá ódýrasta farið. Mér fannst þetta nú ekki svo mikið mál þá, vika .. en núna þá er ég byrjuð að finna fyrir kunnulegri tilfinningu. Samviskubiti. Að mér læðist sú hugsun að ég ætti að tékka á fari heim aftur á fimmtudag frekar en að vera að valsa um Köben í nokkra daga. Hvort ég sé að gera Snorra rosalegan grikk með því að hverfa í viku. - Á að útskýra fyrir Snorra að mamma verði í burtu í svona marga daga (held uppi 7 fingrum) - eða á bara að láta nægja að segja að mamma fari í smá ferðalag og komi svo fljótlega aftur... á að segja ekki neitt og láta Daníel um að svara spurningum ef þær koma. Svona þegar barnið fattar að mamma er hvergi sjáanleg?

Æj, ég veit vel að þeir bjarga sér feðgar. Ég hef auðvitað mestar áhyggjur af því hvort ég meiki heila viku án þeirra, svona með góðu móti. Ég er greinilega aðeins háðari stubbnum mínum en ég hélt - og Daníel við förum út í það.

2008-08-12T09:52:00.003Z

Allt í einu er kominn miður ágúst, ég fer til Óslóar næsta mánudag og þá hefst geðveikin svona rétt fyrir alvöru. En til að gera ekki sjálfa mig að aðra í kringum mig brjálaða tek ég mér smá húsmæðraorlof í Kaupmannahöfn hjá Ása áður en ég flýg aftur heim viku seinna.

Listinn yfir hvað þarf að gerast í vinnunni áður en ég fer í orlof lengist og lengist, og þá er ekki gert ráð fyrir því að tíminn í vinnunni styttist og styttist. - Það er alltaf svoleiðis. Ég man þegar ég minnkaði við mig á VÍ þegar ég gekk með Snorra að þá fór ég að sleppa matar og kaffitímum til að geta unnið meira... note to self EKKI gera það núna!

Annars eru húsmóðurgenin búin að fá útrás undanfarið, búið að búa til rifsberjasultu, smá skógarberjahlaup, saft úr hratinu af því og í dag stendur jafnvel til að sækja meira rifs út í garð. Annars er uppskeran hreint með ólíkindum... hér sést Snorri að störfum...

Um verslunarmannahelgina fórum við svo á ættaróðal pabba á Skaga, þar er verið að gera upp gamalt og til þess að gera ónýtt hús sem þau systkynin keyptu nýlega. Á tímabili var verið að vesenast í vatnsinntaki eða einhverju slíku og húsið vatnslaust. Þegar Snorra (sem þarna er græn kisa, eða það sem eftir var af andlitsmálingunni) langaði í vatn voru við því fremur óhefðubundnar lausnir. Þarna drekkur hann vatn úr bæjarlæknum sæll og glaður. Honum fannst ekkert fútt í að fá vatn úr krana eftir þetta.

...og að vera með lokuð augun þegar ég reyni að taka myndir er greinilega nýjasta nýtt...

2008-08-06T16:29:00.001Z

- and furthermore..

Á heimasíðu Óslóarháskóla þar sem veirð er að kynna land og þjóð fyrir erlendum nemum stendur m.a.

""Norway is a small country in the world", as one Norwegian politician was famously quoted. With a population of 4 million, this is obviously true. Though Oslo's population has only recently passed the half million mark, the city is still the metropolis of Norway. You will have to go farther north, however, if you want to experience the midnight sun. Furthermore, polar bears have not been reported to attack school children for the last couple of thousand years, as they're not part of the mainland fauna at all.

Gott að vita.

2008-08-06T10:40:00.001Z

"Ég vil ekki fara í vinnuna mína á leikskólanum" heyrðist á heimilinu í morgun. Eins og Snorri var rosalega spenntur í gær að fara í leikskólan. Bakslagið kom sennilega þegar það kom í ljós að hann fer ekki upp á næstu deild, Kríumýri fyrr en seinnipartinn í mánuðinum - ekki strax í dag.

2008-07-30T16:23:00.003Z

Hitabylgja

Hitametin falla í dag, hitametið í Reykjavík er fallið - núna kl. 16 sýndi sjálfvirkur mælir Veðurstofunnar á Bústaðavegi 24.6 gráður, sem er 0.3 gráðum hærra en metið frá því í ágúst 2004. Mælirinn á Reykjavíkurflugvelli sýnir svo 25.6 - sem ég er ekki viss um að teljist í metið þar sem lengsta gagnarunan er frá Bústaðaveginum.

Hitametið fyrir landið, 30.5 gráður er síðan ekki langt undan, t.d á Þingvöllum eða inn til landsins á suðurlandi - en það er þó ekki alveg víst.

2008-07-19T00:26:00.003Z

Sumarfrí - þriðji hluti: Læknisheimsóknin

Í Hænuvík við Patreksfjörð þar sem ekki var heitt vatn í krönum eða full lofthæð tók Snorri upp á því að fá hita. Hann neitaði að sofa og svo versnaði hitinn. Eftir smá umhugsun ákváðum við öll (sem sagt líka Jóhanna Ósk, Bjartur og Friðrik Valur sem með okkur voru) að taka okkur upp og gista á Bíldudal næstu nótt. Snorri sofnaði um leið og við ákváðum þetta og svaf svo í bílnum alla leið að Patreksfirði. - Þetta eru reyndar ekki nema 48 km en vegirnir þvílíkir að við töluðum orðið um Ólafsfjarðarmúla I, II og III. Og svo voru það grjótin sem upp úr "malar"veginum stóðu. Þau voru alveg til að brýna hníf á.

Allavega, drengurinn svaf þarna í svona tvo tíma og braggaðist nokkuð við það. Við lékum okkur því og lásum bækur og Snorri og Friðrik Valur horfðu á Línu Langsokk fram að mat - sem var dýrindis lambahryggur sem við Jóhanna grilluðum með stæl. Rétt fyrir mat bað Snorri um að fá að fara að sofa, sem alla jafna er auðsótt mál og við fórum upp á herbergi. Snorri var enn með hita svo hann fékk stíl og sofnaði. Eftir uþb. þrjá tíma vaknaði hann upp, mun heitari en áður. Þegar hann loksins náði að sofna aftur um miðja nótt svaf hann svo ekki nema í hálftíma áður en hann vaknaði upp með óhljóðum og var svo heitur orðinn að ég ýki ekki þegar ég segi - sjóðandi heitur á enninu.

Ég reif hann úr öllum fötum og tók af honum sængina og var eiginlega hætt að lítast á blikuna. Hvað í ósköpunum var ég að hugsa að fara ólétt, með lítið barn í sumarfrí á stað eins og Vestifirði!? Er maður ekki í miðijum óbyggðum? Þar eru ekki læknar nema maður fái far til þeirra með þyrlu ... hvert hringir maður til að fá Gæsluna á Bíldudal? Ætli þyrlurnar séu með skoðun? Eru flugmenn nokkuð í yfirvinnubanni??- Skömmu eftir mesta panikkið og annan stíl bráði nú af Snorra og hann drakk svolítið af mjólk og át Bubba Byggi kex, sem eingöngu er í boði ef menn eru virkiklega veikir.

Eftir smá spjall þá sofnuðum við öll þrjú og sváfum fram á morgun, Snorri var þá mun skárri en greinilega vansvefta eins og forledrarnir eftir nóttina. Við ákváðum samt að drífa okkur á Bolugnarvík. Minnug þess að hafa lesið færslu hjá Ylfu Mist um unglækninn þar vissi ég amk. að þar væri læknir sem hægt væri að leita til og daginn eftir ákvað ég að fara með Snorra á heilsugæsluna. Snorri hefur áður farið til læknis og upp úr minningunni stendur helst hlustunarpípan og þegar læknirinn hlustaði hann. Þess vegna var hann ekki alveg sannfærður þegar læknirinn mætti í gallabuxum og hettupeysu - með enga hlustunarpípu um hálsinn og ætlaðist til þess að fá að skoða útbrot sem höfðu komið með hitanum. Hann (Snorri sem sagt) spurði því mjög skilmerkilega "átt þú ekki hlustunarpípu?" - Heimilislæknirinn okkar er einn af þessum miðaldra mönnum sem alltaf eru í vel straujuðum buxum með uppábrotum og stífuðum skyrtum, það var kannski ekki furðulegt að barnið skyldi vilja fá einhverja sönnun fyrir því að þetta væri í raun og veru læknir. En læknirinn átti hlustunarpípu og hlustaði barnið meira að segja - og gaf honum svo verðlaun. Ráðleggingar varðandi útbrotin virkuðu mjög vel og Snorri var ekki síður hrifinn af kubbunum á biðstofunni en hlustunarpípunni, svo í allt tók heimsóknin á heilsugæsluna klukkutíma. Enda svo sem í lagi að hann kubbaði í smá tíma þar sem það varð að hafa af honum sundferðina.

Það sem sagt ERU læknar á Vestfjörðum og ekki verður upp Heilsugæsluna á Bolungarvík borið að þar sé ekki góð þjónusta við ferðamenn. Við Snorri þökkum sem sagt fyrir okkur, ég fyrir hugarrónna og hann fyrir verðlaunin og kubbana!

Uppi á Bolafjalli

2008-07-17T22:35:00.002Z

Sumarfrí - annar hluti

Eftir viku á Vestfjörðum erum við komin heim og afar sátt við okkar. Sérstaklega Snorri sem ekki hafði verið heima hjá sér í þrjár vikur þar á undan og var líklega fegnastur af okkur öllum að koma heim. Svo feginn að hann fór ekki út úr húsi í dag, heldur endurnýjaði kynni sín við Barbapapa, Línu Langsokk, Emil í Kattholti, kubbana sína og líklega helst af öllu rúmið sitt. Það sem barnið er þreytt eftir ferðalögin.

Auðvitað er mikið álag á litla kroppa að sofa á nýjum stað á næstum því hverri nóttu, keyra í margar klukkustundir í einu. Svo mikið álag að Snorri meira að segja veiktist frekar hastarlega og við ákváðum að flýja eldgamla húsið sem við höfðum á leigu í Hænuvík (þar sem hvorki var full lofthæð né heitt vatn í krönum) og hröðuðum okkur á fínt gistiheimili á Bíldudal. En Vestfirðirnir voru eru yndislegir og við vorum bara nokkuð dugleg við að skoða okkur um.

Myndir og svona almenn frásögn kemur kannski á morgun. Annars lofa ég engu.

- Svo er von á öðrum strák. Fyrir þá sem voru að velta því fyrir sér.
Grislingur annar, gjörið svo vel:

2008-06-25T11:23:00.002Z

Sumarfrí

Nú er Snorri kominn í sumarfrí frá Leikskólanum. Yndislega starfsfólkið þar fær auðvitað sitt sumarfrí - sem þær eiga sennilega betur skilið en margir aðrir sem eiga lengra sumarfrí og fá hærri laun.

En nú er sem sagt enginn leikskóli fyrr en eftir verslunarmannahelgi - og undir einhverjum kringumstæðum hefði ég kannski panikkað og velt því fyrir mér hvernig í ósköpunum við kæmumst af með enga daggæslu. En það er dáldið síðan ég áttaði mig- afhverju í ósköpunum að taka vinnuna fram yfir barnið mitt? Við lifum það alveg af þó ég taki launalaust frí í viku þegar orlofinu sleppir.

Nú erum við Snorri heima að dúlla okkur, ég þarf að klára sængurgjöfina handa nýfæddum Ágústi Íslefi sem fæddist í Danmörku í gær. Hamingjuóskir til foreldranna héðan af Þjórsárgötunni.

2008-06-16T10:20:00.003Z

Landsleikur

Eftir að hafa horft á karlalandsliðið í handbolta í sjónvarpinu undanfarið, við mikinn fögnuð Snorra sem finnst óendanlega sniðugt þegar pabbi hans öskrar á sjónvarpið þá var ákveðið að hreinlega mæta á landsleik Íslands og Makedóníu í gær. Í ljósi þess hvað við höfum predikað hjólreiðar hér á heimilinu, bæði hvort við annað og aðra sem hingað koma þótti rétt að hjóla framhjá bílaþvögunni á leiðinni í Laugardalshöllina og gera smá hjólatúr úr deginum líka.
Snorri var píndur til að taka sér miðdegisblund eftir hádegið, nokkuð sem hann er nánast hættur að gera en þar sem barnið var nú frekar illa sofið eftir veisludaginn mikla á laugardaginn (sem verður kannski talað um síðar) þá þótti mér nú ólíklegt að hann myndi hafa hávaðann í Laugarladshöllinni af án hvíldar. Eins og gerist oft þá neitaði hann að sofna og vesenaðist í lengri tíma - en lét svo undan uþb. hálftíma áður en við lögðum af stað. Það var því frekar stúrinn strákur sem settist í hjólastólinn og þegar við komum í Laugardalshöllina rétt um það bil sem allir í Laugardalshöllinni sungu þjóðsönginn var ruglingurinn hjá barninu í hámarki. Hann hélt að við ætluðum að sjá karlana sem við sjáum í sjónvarpinu spila handbolta, en í staðinn voru einhver þúsund manns syngjandi. Hávaðinn var auðvitað svolítill svo litli maðurinn var frekar lítill í sér í fyrri hálfleik. -Í seinni hálfleik var nú allt annað uppi á teningnum hann meira að segja klappaði í takt. - Hann er voða monntinn af þessu afreki að hafa farið í íþróttahöllina.

Eftir lætin fórum við í Grasagarðinn og fengum okkur að borða, svo hjóluðum við aftur heim, Laugardalinn, Sæbrautina og í gegnum Skuggahverfið og miðbæinn. Eins og það er nú mikið af framkvæmdum í gangi á þessum slóðum þá var Snorri kominn í algjöra paradís byggingarkrana og vörubíla, honum leiddist því alls ekki á leiðinni heim.

2008-06-12T11:34:00.002Z

Bara til að monta mig ...

2008-06-11T21:04:00.002Z

Búrókratían

Óslóarháskóla nægði sem sagt ekki að fá vottað afrit af vegabréfinu mínu til að fá sönnun fyrir því að ég sé íslensk. Svo fengu þau afrit af útskriftarskírteininu mínu frá Oklahoma, sem og námsferlinum - sem veðurfræðideildin var einmitt mjög ánægð með. Í dag fékk ég bréf. - Ég get ekki verið skráð í skólan fyrr en þau hafa fengið afrit af stúdentsprófsskírteininu mínu... þessu sem ég lauk fyrir 8 árum.

Spurning hvort þau vilji svo grunnskólaeinkunnir á eftir því...

2008-06-10T23:14:00.002Z

Munurinn á fyrstu og annari meðgöngu

Á fyrstu meðgöngu var ég alltaf með það á hreinu, upp á viku og dag, hversu langt ég væri komin, og það stóð aldrei á svari þegar fólk spurði. Núna gef ég upp svona bil einhverskonar. Venjulega þarf ég að telja eitthvað aftur og gef upp svona tveggja vikna bil..

Ég lagði mig þegar ég þurfti, lyfti ekki litla fingri í endurbótum á húsinu og fór til Spánar þar sem ég sprangaði um Barccelona í viku - fann lítið sem ekkert fyrir því. Núna á 16. viku er ég farin að fá samdrætti með verkjum. Þeir eiga ekki að koma fyrr en í fyrsta lagi eftir ca. 4 vikur - og þá verkjalausir. Ef ég myndi leggja mig í hvert sinn sem mér finnst ég þurfa þess myndi ég líklega missa af næsta hálfa árinu hjá Snorra. Svo er ég með háan blóðþrýsting. Ekki alveg sami fyrirmyndar sjúklingurinn og síðast

Síðast ætlaði ég að vinna þangað til tveimur vikum fyrir áætlaðan fæðingardag - núna ætla ég amk. að taka mánaðarfrí áður en áætlaður fæðingardagur rennur upp.

Síðast tók ég áætlaðan fæðingardag mjög alvarlega. Nú geri ég ráð fyrir amk. 6 dögum aukarlega. Kannski 9.

Í öðrum fréttum er allt gott, ég vann mína síðustu vakt á Stöð 2 um helgina og þungu fargi af mér létt þar, en í staðin koma bara tvö stór verkefni í viðbót, mastersnám og rannsóknarverkefni. - Í staðinn fyrir tvær tvær vinnur er ég nú - svo gott sem - í þremur. Gengur rosalega vel að losa sig við verkefnin...

2008-06-06T10:52:00.002Z

Ísbjörn

Þrátt fyrir að ísbirnir hafi þá ímynd að vera voðalega sætir og krúttlegir litlir húnar, sbr. Knútur þá er staðreyndin sú að þetta er stórhættuleg rándýr sem ráðast á, drepa og éta fólk.

Hvað í ósköpunum heldur fólk að annað hefði verið hægt að gera en að drepa dýrið? 250kg unglingsísbjörn er ekkert leikfang - annaðhvort drepur þú hann eða hann þig, og líklega hefði fólk ekki verið mjög hrifið þegar húsdýr af bæjum Skagastrandarsýslu hyrfu sporlaust í gin kauða.

Setja hann í Húsdýragarðinn?? Já ok, hvað ætlaði fólk að gera vð Bjössa á meðan aðstaða fyrir hann var byggð, setja hann í tjörnina með selunum?

Ég er nú meira spennt yfir því að fá að vita hvernig bjössi komst hingað til að byrja með.

2008-06-03T17:36:00.002Z

Sumar vikur er eins og allt gangi upp.

Í síðustu viku var ég svolítið á báðum áttum með allt og alla (figuratively speaking...) En svo fékk ég tvö skemmtileg símtöl, annað sem bauð mér á Norræna veðurfræðiþingið í þessari viku - og svo hitt sem sagði mér að ég ásamt tveimur öðrum vísindamönnum hafði fengið rannsóknarstyrk til að gera rannsókn á þurkatímabilum og áhrifum þeirra á neðanjarðarstrengnum frá Nesjavöllum til Reykjavíkur.

Ég fór svo á ráðstefnuna sem byrjaði í gær, hitti þar fyrir Jón Egil Kristjánsson veðurfræðing og prófessor við Óslóarháskóla og hann færði mér þær fréttir að mér hefði verið hleypt inn í mastersnám við skólann, og ekki nóg með það heldur þá eru þeir svo impóneraðir yfir BS náminu mínu, skólanum, áföngunum sem ég tók og svo leiðbeinandanum mínum að líklega slepp ég við alla kúrsa og fer beint í mastersverkefnið!!

1. júní var svo ár síðan ég hætti að vinna hjá Veðurstofu Íslands...

Tilviljun?? - ég held ekki...

2008-05-29T19:30:00.003Z

Fólk á á suðurlandi er þegar farið að tjalda - fólki er bent á að vera utandyra og þó ekki væri fyrir hættu á eftirskjálfta þá bara vegna þess að líklega er allt á tjá og tundri innandyra, glerbrot og annað.
Hvernig væri nú að hjólhýsa, fellihýsa og húsbílaeigendur í nágrenninu ( hér á ég við höfuðborgarbúa...) byðu þessu fólki lúxus ferðasamastaði sína - frekar en að geyma herlegheitin í geymlsum á meðan heilu fjölskyldurnar hafast við í tjaldbúðum.
- Það rigir á suðurlandi á morgun og laugardaginn.

2008-05-21T19:44:00.002Z

Heyrðist yfir kvöldmatnum...

- persónur og leikendur: Snorri, mamma og pabbi.
- leikmunir: rakur þvottapoki, kvöldmaturinn

mamma: Snorri hættu að naga þvottapokan!

Snorri: NEI!

mamma: Snorri minn, maður á ekki að stinga þvottapokanum upp í sig!

Snorri: JÚ

mamma: Snorri! SNORRI hættu þessu! (- tekur svo þvottapokan út úr barninu með valdi)

Snorri: (Setur í brýrnar og segir með mjög samanbitinni röddu) ÉG heiti bara Daníel Brandur!!

pabbi: Nei, ÉG heiti Daníel Brandur

Snorri: NEI!! BARA ÉG heiti Daníel Brandur, pabbi bara heita Daníelsson

Það liggur í augum uppi að besta leiðin til að losna við skammirnar er með því að skipta um nafn um stundarsakir...

2008-05-17T22:55:00.002Z

Saltið

Þegar maður hefur birst svona kannski hundrað þúsund manns á sjónvarpsskjánum í óléttufötum þá er líklega mál að segja frá því sem koma skal.

Það er sem sagt von á gríslingi númer tvö. Í nóvember, seint svo ég skýt á 1. des svona af fenginni reynslu.

Saltsparnaðurinn kemur svo til af blóðþrýstingshækkun sem strax lét á sér kræla - reyndar eru kílóin líka örfáum fleiri núna en á sama tíma síðast svo það er aðhald á alla kanta - segi það ekki, fjandinn ef ég þarf að telja kaloríur hjólandi 29km á dag... sjáum til :-)

The cat is out of the bag... eða þannig.

(ég er svo búin að segja upp á stöð 2, hafi einhver áhuga á svoleiðis fréttum)

2008-05-12T23:28:00.004Z

Ungamamman

Í dag fórum við í heimsókn í Bakkaselið - og þó fyrr hefði verið. Við ætluðum að hjóla familían en þegar allt kom til alls sváfum við öll á okkar græna á milli tvö og fjögur þannig að það var helst til seint að leggja af stað frá Þjórsárgötunni hjólandi klukkan fjögur svo við fórum á bílnum, sem var svo sem ágætt því matvinnsluvélin sem átti að skila kemst tæpast fyrir á hjólinu.

Snorri fékk að vera eins frjáls og hann mögulega gat í útiveru, við foreldrarnir vorum bara í eldhúsinu ásamt Söru, á meðan drengurinn fékk að leika sér á leiksvæðinu beint fyrir utan, svo var bara opið út. Leiksvæðið er á milli bílastæðis í botnlanga og húsaraðarinnar svo þarna er engin hætta á ferðum- ansi langt í næstu umferðargötu og Snorra fanst hann greinilega vera orðinn alveg rosalega stór að mega vera úti að leika "án eftirlits" þó að hann hafi auðvitað verið undir eftirliti allan tímann.

Á leiksvæðinu voru nokkrir krakkar, systkyni sem búa í næsta húsi bæði nokkrum árum eldri en Snorri en þau þrjú virtust bara eiga ágætlega saman og þegar Snorri kom með sandkassadótið sitt þá settust þau öll niður og léku sér fallega saman. Eftir smá stund sá ég hvar elsti strákurinn stóð upp með skóflu og fötu í eigu Snorra og gerði sig líklegan til að fara eitthvað með dótið. Eins og ungamömmu sæmir hljóp ég í dyragættina og kallaði á strákinn - "heyrðu, þú mátt ekki fara neitt með dótið hans Snorra!" - strákurinn varð nú örlítið fúll yfir þessari stjórnsemi hann ætlaði bara aðeins fyrir neðan hérna - í sandkassann... eftir útskýringar þess efnis að Snorri mætti bara vera á þessu tiltekna leiksvæði og hans dót þar með lét strákur til leiðast og hætti við förina. Smá stund líður og stór frænka systkynanna bættist í hópin. Sú er greinilega mun eldri og um leið og hún kom truflaðist orkan í hópnum alveg gjörsamlega. Hún tók kisudót sem Snorri hafði fengið hjá Söru án þess að spyrja, vappaði með það eitthvað um svæðið og var greinilega að espa frændsystkyni sín eitthvað upp. Snorri horfið á hana tortrygginn í dálítinn tíma uns hann ákvað bara að koma inn og heilsa upp á okkur í smá stund. -Ég fór aftur í dyragættina og kallaði á stelpuna að hún mætti ekki taka af honum dótið án þess að spyrja leyfis - þetta væri hans dót! Hún varð nú örlítið skömmustuleg og baðst afsökunar, sagðist ekki vita að þetta hefði verið hans dót, hún bara sá þetta liggja þarna.

Þegar Snorri fór út aftur eftir pönnsuát hjá Söru voru krakkarnir þrír sem fyrir voru komin með poka af poppi. Ekkert þeirra greinilega vildi gefa Snorra með sér svo hann kom svolítið niðurlútur til mín og sagðist langa í popp. Það vildi nú svo vel til að Sara frænka átti popp og þessa líka fínu popp skál sem Snorri fékk að fara með út, en þegar poppið hans Snorra var tilbúið þá voru krakkarnir búnir með sitt popp. (Og einn frændinn í viðbót kominn í hópinn)

Mér þótti sýnt að Snorri fengi sennilega ekki að smakka sitt eigið popp nema með því að ég sæti hjá honum og stjórnaði straumnum af lúkum sem vildu endilega fá af hans poppi - og þegar allt kom til alls var það greinilega alveg rétt innsæi.

Snorri var auðvitað ánægður með poppið sitt og þar sem hann hefur enn ekki fattað eigingirni að neinu marki datt honum ekki í hug að deila ekki með sér. Ég var alveg ofboðslega stolt af tveggja ára snáðanum mínum sem gaf öllum sem vildu popp - og hafði greinilega ekki erft nískuna við þau hin. En, það sem stakk mig var að þessir sömu krakkar og ekki vildu deila poppinu sínum með honum óðu í poppskálina án þess að svo mikið sem spyrja leyfis- Snorri sat með skálina í kjöltunni það var ekki eins og stæði á víðavangi. Ég hvessti nokkuð á hópinn og sagði þeim að það væri bara almenn kurteisi að vaða ekki í mat annara, sérstaklega þar sem þau hefðu nú ekki verið svo dugleg að deila með honum. Ef þau langaði í poppið hans þá skyldu þau spyrja leyfis - og það í hvert sinn!

Snorri hefur gaman að því að deila með sér og þegar krakkarnir spurðu svo "má ég fá popp" þá gaf hann þeim sjálfur eitt og eitt í einu, enda finnst honum það alveg eðlilegt, maður tekur ekki troðfulla lúku af brauði eða pönnukökum, bara eitt í einu. Það sama á við með poppið. En hann var hissa þegar fimm lúkur í einu óðu ofan í poppskálina hans - og gripu með sér troðfullar lúkur.

Ég þurfti að minna krakkana, sérstaklega þau tvö elstu á að biðja um leyfi - í hvert einasta sinn. Tveir aðrir strákar komu svo fljótlega og sá eldri af þeim spurði hvort hann mætti fá fjögur popp. Snorra játti því líka, en þegar hann sá strákinn taka fjögur í einu varð hann svolítið hissa - sennilega á græðginni.

Þegar þau höfðu flest fengið nóg af poppi misstu þau áhugan á Snorra og skálinni hans - og ekki eitt einasta þakkaði fyrir sig. Ég spurði þau öll hvort þau ætluðu virkilega að bara fara og segja ekki einusinni takk fyrir mig og bless - það var voða fátt um svör en þau þorðu ekki annað en að segja amk. Takk.

Nú veit ég ekki hvort börn almennt vaða í skápa og hirslur heima hjá sér án þess að biðja um leyfi - hvað þá á öðrum heimilum en mér hefur alltaf þótt sjálfsagt að biðja um leyfi í annara manna húsum. Eftir fjögura ára samband við tengdaforeldra mína er ég núna farin að fá mér vatnsglas án þess að spyrja leyfis.

Fólki finnst kannski eitthvað asnalegt við það að ég sé að reyna að ala upp annara manna börn, en þegar kemur að því að þau kunna sig ekki í umgengi við mitt barn finnst mér bara ekkert að því að setja reglur. Í hverfinu okkar býr strákur sem er 5 ára. Alltaf þegar við hittum hann á róló er hann með stæla og læti og gerir ýmislegt sem ekki má, t.d. labbar hann upp rennibrautina og rennir sér aftur á bak niður, hlutir sme ég er að banna tveggja ára barninu mínu. Ég hef miskunarlaust sagt stráksa að það megi ekki fara svona glæfralega og þegar hann hlýðir því ekki þá hef ég bara sagt honum að ég vilji ekki að hann kenni Snorra svona læti og vitleysu.

Þegar kemur að mínu barni set ég mörkin - alveg sama hvort það er inni á mínu heimili eða annars staðar. Ég er kannski svona leiðinleg - en ég er viss um að Snorri hefði þakkað mér fyrir hjálpina í dag ef hann hefði vitað hvernig popp útdeilingin mikla hefði geta farið fram.

2008-05-08T21:54:00.002Z

Hjólað í vinnuna

16 km í gær
29 km í dag

29 á morgun líka

2008-05-06T18:41:00.003Z

Í kjölfar hækkandi matarverðs, kreppu og tali um niðursveiflur á mörkuðum þá tók hagsýna húsmóðirin til starfa í gær. Þá voru bakaðar langlokur til að hafa í nesti, eldaður afsláttarkjúklingur og tilboðspasta. Í dag er lasagna í matinn, með kjöti úr sveitinni - sem vitanlega er mun hagstæðara en annað kjöt - og afgangs pastaskrúfunum í millilag í stað lasagne plata. Nýtnin í hámarki. Svo er bara drukkið vatn og saltið sparað.

- það kemur reyndar af öðrum ástæðum sem mögulega verða gefnar upp innan skamms.

2008-04-22T15:59:00.002Z

BROSTU

Einhver spéfuglinn ö nú eða sálfræðingurinn á einkanúmerið BROSTU. Sá hinn sami mætti mér á leið í vinnuna - og hafði tilætlaðan árangur. Ég brosti!

Þetta er líklega betri leið til að forða mönnum frá road rage... amk. betri en að hafa rifla í bílnum eins og Texas búarnir.

2008-04-14T22:43:00.002Z

Fréttablogg

eða svona næstum því. Ég hlustaði á kvöldfréttir að mestu leyti í bílnum á leiðinni heim úr vinnunni í dag, og þar voru amk. tvær fréttir sem ég ákvað að blogga um. Önnur var auglýsingar í barnatímum, þá sérstaklega skyndibita og nammiauglýsingar hitt bara man ég ómögulega. Spurning um að athuga ruv.is og sjá hvort þetta rifjist upp.

Ég nenni samt ekki að blogga um þetta akkúrat núna - en gott að skrifa niður þó ekki sé nema til að ég muni það sjálf!

2008-04-08T15:17:00.002Z

Mótmæli

Í gær lokuðu vörubílstjórar Tryggvagötunni með þeim afleiðingum að tveir ráðherrabílar festust, ólöglega lagt, upp á gangstétt. Forstætisráðherra fór í fússi út um bakdyr Listasafnsins( eða fór Viðskiptaráðherra út um bakdyrnar??) og ráðherrarnir máttu svo fara fótgangandi til baka í sín ráðuneyti. Æjh aumingja mennirnir, annar þurfti að labba alla leið frá Tryggvagötu að Lækjartorgi en hinn mátti leggja í langferð á Sölvhólsgötuna.

Nú veit ég ekki hvaðan þessir menn voru að koma, en ef ráðamenn landsins láta aka með sig innan miðbæjarins á bensínbílunum sínum - og NB báðir voru þeir á bílum, engum hefur dottið "carpooling" - eiga þeir ekkert með það að segja almenningi að hunskast til að minnka bensíneyðslu og bílaumferð. Auka hjólreiðar og nýta sér rándýrar óhentugar almenningssamgöngur.

Það var fínt veður í gær, hvorugur þeirra hefði fengið lungnabólgu við labbið.

EF þeir voru að koma af fundum annars staðar á landinu, eða t.d. bara ekki í miðbænum þá hefðu bílstjórarnir amk. geta hleypt þessum ágætu mönnum út og keyrt svo til sinna vinnustaða þar sem þeir, án ef hafa merkt lögleg bílastæði.

Skammist ykkar Geir og Björgvin fyrir sóun á almannafé, lélegu fordæmi og nöldri yfir engu!

2008-04-08T15:04:00.003Z

Nafnavenjur

Íslenskar nafnahefir eru frekar erfiðar fyrir útlendinga að skilja. Fjögur nöfn á póstakassanum hjá sex manna fjölskyldu - og það bara ef börnin eru fjögur, tveir strákar tvær stúlkur og þau öll samfeðra...

Þessar nafnavenjur eru líka svolítið erfiðar fyrir tveggja ára stubb sem er að læra nöfn sinna nánustu.

Hann veit alveg að hann sjálfur heitir Snorri Daníelsson, mamma heitir Elín Björk og pabbi Daníel - stundum man hann að pabbi heitir Daníel Brandur.
En oft þegar kemur að því að kalla á pabban, með nafni sem er í dag rosalegt sport þá heyrist innan úr herbergi " Pabbi Daníelsson!!!" og þegar þetta kemur upp reyna foreldrarnir (mamma Elín og pabbi Daníel) reyna að leiðrétta barni, en þá segir hann bara "Nei, ekki pabbi Daníel, bara Daníelsson".

Þessu þrasi er auðtapað af okkar hendi, drengurinn svo staðfastur og svo er þetta líka bara svo lógíst... Svo segir hann reyndar ekki Daníel heldur Dalel, en það kemur!

2008-04-01T10:34:00.002Z

Aprílgabbið í ár?

Ég er búin að sjá aprílgöbbin á visir.is og mbl.is - en þú?

uppfært.. og barnaland.is er líka með svolítið skemmtilegt gabb :-)

2008-03-31T23:12:00.002Z

The one with the blackout

Það átti ágætlega við í dag þegar rafmagnið fór af húsinu sem ég vinn í að ég hafði nýleg hlaðið Friends þætti inn á iPodinn minn - og ekki bara hvaða Friends þætti sem er heldur:

The one with the Blackout

"

2008-03-28T10:01:00.003Z

Á heimilinu snýst nú allt um koppaþjálfun. Í kjölfarið hefur litli maðurinn mikinn áhuga á því þegar foreldrarnir fara á klósettið. Hann bíður í offvæni við dyrnar og svo þegar við komum fram þá kallar hann "mamma rosa dugleg að pissa í klósettið, veiiiiii" og klappar svo og dansar.

Annars er barnið orðið svona fullorðið:

2008-03-06T23:21:00.004Z

Fjölskylduerjur

Við Jónas Davíð í eigum í erjum þessa dagana. Hann segist vera stóri bróðir minn, af því að hann er hærri en ég - vill sem sagt að ég kalli hann stóra yngri bróður minn. Mér finnst þetta helber vitleysa. Ég var svo gott sem viðstödd fæðinguna hans, gaf honum fyrsta bangsann, spilaði í skírninni hans og skipti um bleyjur á honum (og hinum tveimur líka, ef Jóeli Geir skyldi detta í hug að hefja samskonar stríð við mig)

Hér eru svo myndir máli mínu til stuðnings:

* ég smíðaði pallbílinn handa Jónasi í smíðum þegar ég var 11 ára
** já, Jónas Davíð er eina rauðhærða barnið í fjölskyldunni þannig að ég get ekki notað myndir af hinum börnunum og svindlað!

2008-03-05T22:03:00.002Z

Próftíð

Það er próftíð, og mér finnst ákaflega furðulegt að taka þátt í henni sitjandi hinu megin borðsins en venjulega. Stressið fólst í því að gera sangjarnt - en þó krefjandi lokapróf, fara yfir skýrslur og svara stressuðum nemendum.

Þessi yfirferð á skýrslum sýndi mér enn og aftur að það er mjög misjafnt hvernig háskólanemar eru undirbúinr undir námið sitt. Ég fékk nokkrar skýrslur þar sem forsíðu vantaði, heimildaskráin var í hönk og stundnum engar heimildir inni í textanum. Aðrar skýrslur voru alveg glæsilegar. Og ég gaf meira að segja nokkrar 10.

Í þessu verkefni áttu nemendur að vinna úr veðurgögnum og gera veðurspá. Í einni skýrslunni var veðurspáin svo út úr kortinu að ég velti því fyrir mér hvort nemandinn væri að athuga hvort ég læsi yfir verkefnin.

Þannig var að í Oklahoma átti ég mjög góðan vin, bráðkláran alveg. Hann lagði metnað sinn í verkefni sumra áfanga en alls ekki í öðrum. Þar sem viðkomandi er svo samviskusamur að annað eins hef ég ekki séð undraðist ég þetta vinnulag svolítið. Þegar ég spurði hann út í þetta þá lét hann uppi leyndarmál. Í fyrsta verkefni sínu hjá hverjum kennara laumar hann inn "If you are reading this please underline this line". Það þarf líklega ekki að útskýra það frekar hvernig hann fór að því að fá alltaf mjög góðar einkunnir. Þeir kennarar sem ekki lesa yfir verkefnin líta nefninlega bara á meðaleinkuninna hingað til - af hún er A , þá færðu A!

2008-02-29T12:00:00.002Z

Ugh ég er í svo brjálæðislegri sálarkreppu þessa dagana að það hreinlega liggur við að ég sé óvinnufær. - Og kreppan snýst einmitt upp vinnuna...

2008-02-26T21:40:00.002Z

Óskarinn

Ég hef ekkert um óskarsverðlaunin að segja, þ.e. frá kvikmyndarlegu sjónarhorni. Hins vegar finnst mér alveg magnað að á meðan tískutímaritin og tískugúrúar - svo ekki sé minnst á snyrtivörufyrirtækin ala á æsku og lýtaaðgerðum þá eru flottustu konurnar á Óskarsverðlaunahátíðinni ávalt (að mínu mati amk.) reynsluboltar eins og Helen Mirren og Julie Andrews

2008-02-26T16:12:00.002Z

Í MA var ég í bekk sem var síður en svo metnaðargjarn. Mig minnir að einn kennarinn hafi sagt um okkur að loksins þegar hún fengi okkur til að þegja þá værum við öll sofandi.

Veðurfræðibekkurinn minn var aljgör andstæða menntaskólans. 89 var ekki nógu gott ef maður gat nmeð einhverju móti pínt kennaran til að gefa okkur 90 og það má líka sjá á þessari tölfræði sem Aaron Kennedy bekkjarbróðir minn tók saman að við erum hvergi nærri hætt.

2008-02-21T23:04:00.002Z

Sexhundraðasti pistillinn

Ég var að blogga á hinu blogginu þegar ég sá á bloggernum að hér væru komnir 600 pistlar um allt og ekkert frá því í janúar 2003. Auðvitað eru þetta engin afköst. Ekki miðað við meðal moggabloggarann að minnsta kosti.

Helst í fréttum er hinsvegar það helst að ég er búin að kenna. Á Hvanneyri eru "stuttannir" sem sagt, fjórar annir á ári - bara átta vikur hver og nú eru átta vikur liðnar. Það er sem sagt dáldið mikið að missa úr eina viku af átt. Ég fór eins og drusla og kenndi uppbótartíma á föstudag, og ætlaði að kenna líka á morgun en nemendurnir mínir líta út eins og þeir hafi ekki sofið í átta vikur og eru að panikka yfir einföldum exel aðgerðum - mér fannst eiginlega bara mannvonska að kynna nýtt námsefni daginn áður en þau byrja í próflestri. Það er auðvitað allt annað að kynnast nýju námsefni tveimur dögum fyrir próflestur.

En svona í tilefni af 600 pistlum er fyrsti pistillinn (fyrir utan prufuna) endurbirtur.

27.1.03
Já jæja, nú þykist maður ætla að vera duglegur og koma sér inn í þetta blogg samfélag. Svona við fyrstu sýn virðist þetta svolítið flókið, en maður væntanlega verður betri með tímanum...ef ekki þá gefst ég sko bara upp. En sem sagt, hér ætla ég að reyna að skrifa smá fréttapistla frá Oklahoma, svona til að friða ættingjana heima á Íslandi sem aldrei heyra í mér.
Tvær vikur búnar af skólanum og gengur bara ágætlega. Ég er alls ekki komin í svona "ofur nemanda mode" eins og ég var í á síðustu önn, held bara að ég hafi brunnið svolítið út. Ég er til dæmis voða lítið búin að læra yfir helgina, en það má enn bæta úr því. Hér er sem betur fer að hlýna aftur, fór niður í 15 stiga frost í síðustu viku. Það var ansi kalt að hjóla í skólann klukkan átta. Alveg sama sagan hér og á Suðurnesjunum, alltaf leiðindar vindur þannig að það virkar náttúrulega enn kaldara en það er.
Ég er búin að koma mér upp nýju áhugamáli, ég er núna orðin alger aðdáandi listhlaups á skautum. Síðustu helgi fórum ég og Lyne vinkona mín til Dallas þar sem U.S. National Figure Skating Competition var í gangi. Alveg rosalega gaman. Við sáum löngu prógrömmin hjá bæði strákunum og stelpunum, svo ég fékk að sjá Michelle Kwan, Sarah Huges, Tim Goeble og fleiri á ísnum. Í gær fór ég svo á sýningu sem kallast Stars on Ice þar sem heims og Ólympíumeistarar sýna listir sínar. Uppáhalds parið mitt, Elena Berezhnaya og Anton Sikharulidze gullverðlaunahafar frá Ólympíuleikunum í Salt Lake City sýndu þar listir sýnar. Það var alveg magnað að sjá þau svona beint fyrir framan nefið á mér!
Jæja, þetta er gott í bili,
-Elín.

2008-02-10T21:22:00.000Z

Oj, ég er orðin veik. Og líka svona ógeðslega veik. Það er allt í lagi með mig frá öxlum og niður en þar fyrir ofan er eins og ég sé lent í helvíti- mér er svo illt í hálsinum að ég er farin að efast um að hálskirtlatakan hafi átt sér stað!

2008-01-31T00:01:00.001Z

Í kvöld var hringt í sambýlismanninn og röddin sagði, eins og lesið upp af blaði: Já góða kvöldið.

Rödd: X heiti ég, er Daníel Brandur við
Ég: Hann er upptekinn eins og er, get ég tekið skilaboð?
Rödd: Nei, en ert þú konan hans?
ÉG: Já
Rödd: Ég get þá bara talað við þig, ég hringi frá Fréttablaðinu má ég spyrja þig nokkurra spurninga?
Ég: Já, ég vinn reyndar hjá 365 miðlum, gerir það mig ekki óhæfa?
Rödd: Ha, nei nei það held ég ekki ég spyr þig bara
Ég: Ok, láttu vaða
Rödd: Hvaða flokk myndirðu kjósa í Borgarstjórnarkosningum ef kosið yrði núna?
Ég: Samfylkinguna
Rödd: Styður þú ríkisstjórnina?
Ég: Ja, já já svona...
Rödd: heldurðu að fjáhagurinn heimilisins vesni eða batni á næstu 12 mánuðum?
Ég: Bara, verði svipaður
Rödd: Hvaða íslenska sjónvarspmann eða konu sem sést nú sjónvarpi heldurðu mest upp á?
Ég: Ég vinn nú reyndar á Stöð 2... í sjónvarpinu...
Rödd: Svaraðu bara samt
Ég, hugsandi: hmm, Elín Björk Jónasdóttir bara...
Ég - í alvörunni: Hmm, bara Siggi Storumur.

Ég er svona húsbóndaholl greinilega.

2008-01-26T20:15:00.000Z

Snorri getur orðið talað nokkuð skýrt, og sagt mjög mörg orð og nöfn alveg rétt. Ási, Dísa, amma, afi, Elín, Stína, Arna, Iwona, Tina og Tinna eru t.d. orð sem hann segir alveg rétt. Hann segir líka Siggi, en þegar Siggi nokkur stormur er með veðurfréttirnar hrópar Snorri stoltur "SIGGI ORMUR!". Í gærkvöldi vorum við svo í afbragðs matarboði, og vegna ófærðar komst Snorri ekki í næturgistingu hjá ömmu og afa á Vegamótum, hann kom því bara með í matarboðið. Þar voru gestgjafarnir Ágúst Ingi og Lára Bryndís. Snorri segir Lára voða fallega en Ágúst kallar hann GúsGús. Paw fær líka þann vafasama heiður að heita Pó á þessu heimili

Ég hins vegar vinn alla daga þessa dagana og þakka góðum vinum góðar gjafir - Þeir sem lögðu til survival kittsins fá innilegar þakkir fyrir!

2008-01-25T12:18:00.000Z

Brjáluð vika

Bobby Fisher dáinn, Luxor hættir, Dagur hættur, Villi með kombak, Heath Ledger dáinn, Alfreð hættur og Ólafur F orðinn borgarstjóri.

ég á ekki orð

2008-01-16T15:59:00.000Z

Gleðilegt ár!

Að byrja blogg á loforði um bót og betrun í bloggheimum hefur ekki gengið hingað til, svo ekkert slíkt loforð verður gefið út núna. En ég átta mig hinsvegar oft á því að ég blogga fyrir mig og engan annan- og þegar ég lít yfir árið 2007 þá sé ég að ég hef ekki verið alveg nógu dugleg við að koma því á prent sem á daga mína hefur drifð. Þanni að, ef eitthvað merkilegt gerist þá ætla ég að blogga um það. Hvort sem það er strax eða mánuði síðar skiptir ekki öllu máli.

Árið byrjar hins vegar með brjálaðri vinnu því ég er að kenna á Hvanneyri á fyrri vorönn. Er með eitthvað um 20 nemendur og er þess vegna að vinna allan sólahringinn finnst mér, alltaf að velta fyrir mér leiðum til að koma þekkingu á framfæri. Ég vona svo bara að nemarnir mínir verði duglegir að fylla út kennslumatið í lok annarinnar. Það vill svo skemmtilega til að veðrið er mjög samvinnuþýtt þessa dagana, ég get hef alltaf hingað til byrjað tíma á að fara í gegnum veðurspár og hvernig veðrið er í dag, því það er alltaf eitthvað að gerast. Óveður í Grindavík, nú kyngir niður snjó hér á Þjórsárgötunni.

Ég kenni klukkan 9 á þriðjudagsmorgnum. Það þýðir að ég verð að vera farin í vinnuna um k. 7:30. Reglulega fer fullt af fólki frá Keldnaholti til Hvanneyrar og því er sameinast um bíla og yfirleitt farið á bílum sem skólinn á. Í gærmorgun brá svo við að ég var bæði vöknuð aðeins of seint eftir að hafa farið að sofa um þrjú leytið nóttina áður - fullkomnunaráráttan aðeins að drepa mig í fyrirlestragerðinni! - og svo var eitthvað slæmt skipulag á bílum, bara einn fór fyrir átta, hinir þrír kl. 9 og sá sem fór fyrstur var fullur. Ég ákvað því að keyra á mínum eigin bíl. Ég fór á stað áður en hafist var handa við að skafa götur borgarinnar og var því óvenju lengi út úr Mosfellsbænum. Þegar ég var að keyra sem leið lá út á Kjalarnes, rétt á því bili sem götulýsingin hættir var talsverð snjókoma og skafrenningur og ég sá þá rétt svo 10 metra fra bílnum. Eftir að hafa keyrt í smá stund fatta ég að það er eitthvað skrýtið við þetta allt saman, ég sé engan bíl á udan mér og engan á eftir mér í ofanálag þá mætti ég engum bíl! Eftir smá stund fór um mig hrollur og ég efaðist í alvörunni um að ég væir á réttri leið. Algjörlega ein í heiminum og sá engin kennileiti sem hefði fullvisað mig um að ég væri í raun og veru á leið vestur. Guði sé lof fyrir Hvalfjarðagöngin. Ég hef bara sjaldan verið jafn glöð að sjá gangamunann.

2007-12-25T00:09:00.000Z

Gleðileg jól!

2007-12-13T23:17:00.000Z

Upptekið fólk

Í lok nóvember fóru veikindi að herja á Þjórsárgötu 6. Fyrst Snorri - svo Snorri aftur, svo fékk ég svæsnustu ennisholusýkingu síðari ára. Er rétta að ná mér núna. Fór hás og kvefuð í útsendingu. Og það var ekki eins og útsendingarnar undanfarið hafi verð áreynslulausar. Hver lægðin rekur aðra - mér finnst studnum eins og ég tali fyrir daufum eyrum. Að fólk hafi ekki bundið útigrillin sín niður þrátt fyrir ítrekaðar stormviðvaranir tveimur sólahringum áður en lægðin fór yfir. (Í öllum þremur tilfellunum varaði ég við lægðunum tveimur sólahringum áður) - Lægðin sem kemur á morgun.. ég er líka búin að vara við henni - sem og lægðinni sem kemur á sunnudaginn. Samt fljúga lausamunir á hús og inn um glugga. Stundum finnst mér eins og enginn sé að hlusta -eða engin taki mark á mér. Hvort ætli sé verra? Í ofanálag var svo verið að breyta um umhverfi í stúdíóinu, og til að toppa allt saman var klippt í auglýsingar í miðju veðri í morgun.

Fyrir utan sjónvarp hef ég verið að undirbúa kennslu á Hvanneyri sem byrjar í janúar. Búa til ís og baka fyrir afmælisveisluna hans Snorra sem veður á laugardaginn. Og í öllum látunum eru einu merki um að jólin séu á næsta leyti rauður skrautlegur plastdúkur á eldhúsborðinu. Engar seríur komnar - og ekki búið að skrifa jólakortin. Það er ekki einusinni búið að taka myndir fyrir jólakortin.